भोरमध्ये सत्तासमीकरण बदलले; भाजप–राष्ट्रवादी फिफ्टी-फिफ्टी, शिवसेना खातेशून्य

- एक माजी पंचायत समिती सदस्य पुन्हा विजयी झाला असून, सहा नवे सदस्य निवडून आले आहेत.

भोर : भोर तालुक्यातील जिल्हा परिषद व पंचायत समिती निवडणुकीत सत्तासमीकरण बदलल्याचे स्पष्ट झाले आहे. भारतीय जनता पार्टी आणि राष्ट्रवादी (अजित पवार) यांना समान म्हणजेच फिफ्टी-फिफ्टी जागा मिळाल्या असून, दोन जागा असलेल्या शिवसेनेला यावेळी एकही जागा मिळवता आलेली नाही. या निकालात दोन माजी जिल्हा परिषद सदस्यांचा पराभव झाला, तर दोन महिला माजी जिल्हा परिषद सदस्य पंचायत समितीवर निवडून आल्या आहेत. एक माजी पंचायत समिती सदस्य पुन्हा विजयी झाला असून, सहा नवे सदस्य निवडून आले आहेत.

पुणे–सातारा महामार्गावरील वेळू-नसरापूर गटात मागील निवडणुकीत शिवसेनेचे एक जिल्हा परिषद व एक पंचायत समिती सदस्य विजयी झाले होते. मात्र, यावेळी शिवसेनेला येथे एकही जागा मिळाली नाही. भाजपने येथे जोरदार मुसंडी मारत एक जिल्हा परिषद गट व एक पंचायत समिती गण जिंकला, तर एक गण राष्ट्रवादीकडे गेला. उबाठा व शिंदे गटातील मत विभागणीचा फायदा भाजपाला झाल्याचे चित्र असून, शिवसेनेला भविष्यात आपले अस्तित्व टिकवण्यासाठी नव्याने रणनीती आखावी लागणार आहे.

राष्ट्रवादी (शरद पवार)कडून गणेश खुटवड यांना उमेदवारी देण्यात आली होती. मात्र, त्यांना यश मिळाले नाही. भाजपचे माजी अध्यक्ष जीवन कोंडे यांनी नशीब अजमावले; परंतु त्यांची अनामत जप्त झाली. मागील दोन निवडणुकांत पराभूत झालेले ज्ञानेश्वर पांगारे यांनी यावेळी बाजी मारली. नसरापूर गटातून राष्ट्रवादी युवक काँग्रेसचे अध्यक्ष विशाल कोंडे यांनी विजय मिळवत महामार्ग पट्ट्यात अनेक वर्षांनंतर राष्ट्रवादीचे खाते उघडले.

कामथडी-भोंगवली गटात अपेक्षेप्रमाणे राष्ट्रवादीचे विक्रम खुटवड विजयी झाले. या गटात राष्ट्रवादीत बंडखोरी असूनही पक्षाने आपला बालेकिल्ला कायम राखला. पंचायत समिती भोंगवली गणातून भाजपचे रोहन बाठे विजयी झाले, तर कामथडी गणातून राष्ट्रवादी अजित पवार गटाच्या तृप्ती खुटवड यांनी विजय मिळवला. या गटात पती-पत्नी अनुक्रमे जिल्हा परिषद व पंचायत समितीवर निवडून आले.

शिंद-भोलावडे गटात माजी जिल्हा परिषद सदस्य विठ्ठल आवळे यांचा पराभव करत सरपंच प्रवीण जगदाळे यांनी जिल्हा परिषद गाठली. पंचायत समितीच्या दोन्ही जागा राष्ट्रवादीने जिंकत हा गट आपला बालेकिल्ला असल्याचे सिद्ध केले. निवडणुकीपूर्वी भाजपमध्ये झालेले प्रवेश अपेक्षित लाभ देऊ शकले नाहीत.

उत्रोली-कारी गटात माजी उपाध्यक्ष रणजित शिवतरे आणि माजी आमदार संग्राम थोपटे यांच्या पत्नी स्वरूपा थोपटे यांच्यात चुरशीची लढत झाली. नियोजनबद्ध प्रचाराच्या जोरावर थोपटे यांनी मोठ्या फरकाने विजय मिळवत मागील पराभवाचा वचपा काढला. पंचायत समितीच्या दोन्ही गणांत भाजपचे उमेदवार विजयी झाल्याने वीसगाव व अंबावडे खोरे भाजपचा बालेकिल्ला असल्याचे पुन्हा एकदा अधोरेखित झाले.