Zilla Parishad Election : अखेरच्या दिवशी हिंजवडीत बहुरंगी लढत होणार

- पौड येथील पंचायत समिती कार्यालयासमोर सर्वच पक्षांकडून शक्तिप्रदर्शन 

हिंजवडी : जिल्हा परिषद आणि पंचायत समिती सदस्य उमेदवारी अर्ज दाखल करण्याचा आज अखेरचा दिवस होता. सर्वच उमेदवारांनी पौड येथील पंचायत समिती कार्यालयात शक्तिप्रदर्शन केले. सर्वच पक्षांनी आपले उमेदवार दिल्याने, प्रामुख्याने हिंजवडी गटात बहुरंगी लढत पाहायला मिळणार आहे. राष्ट्रवादीने (शरद पवार) दोन गटात तर, काँग्रेसने फक्त दोन उमेदवार उभे केले आहे. अखेरच्या दिवसापर्यंत हिंजवडी गटासाठी २० तर, माण, हिंजवडी गण मिळून २९ इच्छुकांनी आपले उमेदवारी अर्ज दाखल केले आहेत.

दरम्यान, गुरुवार (दि. २२) उमेदवारी अर्जांची छाननी होणार असून, मंगळवारपर्यंत (दि. २७) अर्ज मागे घेण्याची मुदत असणार आहे. मुळशी तालुक्यात तीन जिल्हा परिषद गट आणि सहा पंचायत समिती गणांसाठी निवडणुका होणार आहेत. प्रामुख्याने माण-हिंजवडी गट हा मतदार संख्येने सर्वात मोठा गट आहे. आर्थिक दृष्टीने सदन असल्याने, गट आणि गणांसाठी इच्छुकांची संख्यादेखील या गटात अधिक होती. मात्र, सर्वच प्रमुख पक्षांनी बंडाखोरीला बगल देत सक्षम उमेदवार देण्याचा प्रयत्न केला आहे, तर अपक्ष म्हणूनसुद्धा अनेकांनी आपले उमेदवारी अर्ज भरले आहेत.

आता २७ तारखेपर्यंत उमेदवारी अर्ज मागे घेण्याची मुदत आहे. तोपर्यंत पडद्यामागे नक्की काय हालचाली होतात आणि यातील कितीजण आपला उमेदवारी अर्ज मागे घेणार याकडे मुळशीकरांचे लक्ष लागले आहे.