भिगवण परिसरात जलसंपदा विभागाकडून अतिक्रमणांवर हातोडा

भिगवण राशीन रोडलगत जुने भिगवण गावठाण जवळ ही कारवाई करण्यात येत आहे

भिगवण : इंदापूर तालुक्यातील भिगवण परिसरात जलसंपदा विभागाकडून उजनी पाणलोट क्षेत्रातील अतिक्रमणांवर हातोडा फिरवण्यात आला. उजनी जलाशयाच्या भूसंपादन क्षेत्रात अतिक्रमण करून काहींनी व्यवसाय थाटले होते. याबाबत वेळोवेळी नोटीसा देण्यात आली असूनही अतिक्रमण हटविण्यात न आल्याने आज शनिवारी (दि३) रोजी अतिक्रमणांवर धडक कारवाईला सुरुवात करण्यात आली आहे.

अधिकच्या माहितीनुसार, भिगवण राशीन रोडलगत जुने भिगवण गावठाण जवळ ही कारवाई करण्यात येत आहे. यामध्ये वीटभट्या, घरे, दुकाने पाडण्यात आली. गतवर्षी या अतिक्रमणांबाबत जलसंपदा विभागाच्या पळसदेव भिमा उपसा सिंचन शाखेचे उपविभागीय अभियंता नितीन मधुकर खाडे यांच्या फिर्यादी वरुन गुन्हा दाखल करण्यात आला. खाडे यांनी भिगवण पोलीस स्टेशनला तक्रार देवून अतिक्रमण कारणांवर गुन्हा दाखल केला होता तरी देखील अतिक्रमणांमध्ये वाढ होत असल्याने ही धडक कारवाईला सुरुवात करण्यात आल्याचे अधिकाऱ्यांकडून सांगण्यात आले.