गुंगीचे औषध देऊन बलात्कार करणाऱ्या वसईच्या भोंदू ऋषीकेशला पिंपरीत बेड्या, अत्याचार करुन पसार

भोंदू ऋषीकेश वैद्य याला पुणे पोलिसांच्या गुन्हे शाखेने पिंपरीतून शुक्रवारी रात्री उशिरा अटक केली.

पुणे : दैवी शक्तीचा संचार असल्याची बतावणी करून महिलेवर अत्याचार करून पसार झालेला वसईतील भोंदू ऋषीकेश वैद्य याला पुणे पोलिसांच्या गुन्हे शाखेने पिंपरीतून शुक्रवारी रात्री उशिरा अटक केली. त्याच्याविरोधात ३५ वर्षीय महिलेने तक्रार दाखल केली होती.

पीडित महिला मूळची पुण्यातील रहिवासी आहे. ऑक्टोबर २०२३ मध्ये तिची भोंदू ऋषीकेश याच्याशी सोशल मीडियाद्वारे ओळख झाली. त्यानंतर त्याने तिला फसवणुकीच्या जाळ्यात ओढले. ‘माझ्यात दैवी संचार आहे. ईश्वराची उपासना कशी करायची, याचे तंत्र तुला शिकवितो,’ अशी बतावणी त्याने महिलेकडे केली. तो २०२३ मध्ये पुण्यात आला. त्याने पीडित महिलेची मांजरी परिसरात भेट घेतली. त्यानंतर गुंगीचे औषध देऊन तिच्यावर बलात्कार केला. त्यानंतर त्याने तिला पुन्हा वसईला बोलावले. वसईतही तिच्यावर बलात्कार केला, असा आरोप आहे.

भोंदू खरात प्रकरणानंतर पीडिता तक्रार करण्यास पुढे आल्याने गुन्हा उघडकीस ­

नाशिकमधील भोंदू अशोक खरात याने महिलांना जाळ्यात ओढून त्यांचे लैंगिक शोषण केल्याचे प्रकार उघडकीस आल्यानंतर पुण्यातील पीडित महिलेने पाेलिसांकडे धाव घेऊन तक्रार दिली. तिच्यावर बेतलेल्या प्रसंगाची माहिती तिने पोलिसांना दिली. 

सुरुवातीला तिने वसईतील माणिकपूर पोलिस ठाण्यात फिर्याद दिली. वसई पोलिसांनी संंबंधित गुन्हा तपासासाठी पुण्यातील हडपसर भागात मांजरी पोलिस ठाण्यात वर्ग केला. 

भोंदू ऋषीकेश हा पिंपरी परिसरात असल्याची माहिती पोलिस पथकाला मिळाली. त्यानंतर गुन्हे शाखेच्या युनिट सहाच्या पथकाने त्याला अटक केली, अशी माहिती गुन्हे शाखेचे पोलिस उपायुक्त निखिल पिंगळे यांनी दिली.