"ही बघा पावती! मी हेक्टर देत होतो, पण त्यांनी फॉर्च्युनरच मागितली"; वैष्णवीच्या वडिलांनी सगळंच सांगितलं

आम्ही एमजी हेक्टर ही गाडी बुक केली होती, त्यांनी वादावादी केली, मला फॉर्च्युनर नाही दिली तर मी यांची हेक्टर पेटवून देईन

पुणे: वैष्णवी हगवणे आत्महत्या प्रकरणात पत्नी, सासू, नणंद सासरा दीर यांना काल शिवाजीनगर कोर्टात हजर करण्यात आले होते. त्यावेळी  शिवाजीनगर कोर्टात हगवणे यांच्या वकिलांनी अजब युक्तिवाद केला. आमच्याकडे पाच कोटींच्या गाड्या आहेत. आम्ही चाळीस लाखांच्या फॉर्चुनरसाठी कशाला छळ करू असं म्हणत वकिलांनी सवाल उपस्थित केला. वैष्णवीचे नको त्या व्यक्तीसोबत नको ते चॅट सुरु होते‌. ते आम्ही पकडले होते. त्याची माहिती आम्हाला हवी आहे. आम्हाला न्याय हवा असल्याचे त्यांनी युक्तिवादात सांगितले. वैष्णवीची टेंडंसी सुसाईड करण्याची होती. तीचे एका व्यक्तीसोबतचे चॅट पकडले गेले होते. अशी अजब वक्तव्य यावेळी वकिलांनी केली. त्यानंतर आज वैष्णवीचे वडील अनिल कस्पटे यांनी पत्रकार परिषद घेत वकिलांच्या वक्तव्याचा खुलासा केला आहे.  

फॉर्च्युनर दिली नाही तर आम्ही लग्न मोडू अशी धमकी हगवणे यांनी आम्हाला दिली होती. त्यामुळे आम्ही फॉर्च्युनर घेऊन दिली आणि मुलीचे लग्न लावून दिले. फॉर्च्यूनर देण्याअगोदर मी एमजी हेक्टर ही गाडी बुक केली होती. त्यांनी वादावादी केली. मला फॉर्च्युनर नाही दिली तर मी यांची हेक्टर पेटवून देईन असं सांगण्यात आलं म्हणून फॉर्च्युनर दिली. आरोपीकडे 5 कोटीच्या गाड्या नाहीत. याच्याकडे एकच गाडी  मी दिलेली आहे. गाडी दिली नाही तर लग्न मोडेल अशी धमकी दिली होती. अगोदर दोन लग्न मोडली होती. म्हणून माघार घेऊन आम्ही ही गाडी त्या आरोपीला दिली. 

मोबाईल काढून घ्यायचा तर दिला कशाला  

आरोपीचे वकील बोलले ते मी आणि समाजाने ऐकले. ते चुकीचे बोलले. असे एखाद्या मुलीच्या चारित्र्यावर बोलले हे चुकीचे आहेत. त्यांनी केलेले कृत्य आणि माझ्या मुलीचा बळी याला वेगळी कलाटणी द्यायची आहे. मोबाईल चॅटिंग बाबत आम्हाला कल्पना दिली नव्हती. कुठलीही माहिती दिली नव्हती. माझ्या मुलीवर चारित्र्याचा संशय घेतला आहे. माझ्या मुलीचा मोबाईल काढून घेतला असं ते म्हणाले. मोबाईल काढून घ्यायचा असेल तर मी तिला मोबाईल दिला कशाला? आरोपी जावई याला १ लाख ५२ हजाराचा मोबाईल दिला. त्यांनी मागितला त्यानुसार आम्ही दिला. विकत घेतलेला मोबाईलची रिसीट दाखवली. आजही मी आरोपीला दिलेल्या मोबाईलचे हप्ते भरत आहे.