शिवशाही बस बलात्कार प्रकरणी परिवहनमंत्री ॲक्शन मोडमध्ये; सुरक्षिततेत हयगय करणाऱ्या अधिकाऱ्यांचे निलंबन करण्याचे आदेश

पहाटे स्वारगेट बसस्थानकावर उभ्या असलेल्या शिवशाही एसटी बसमध्ये एका तरुणीवर अज्ञात व्यक्तीने अत्याचार केल्याची घटना घडली.

पुणे : स्वारगेट बसस्थानक परिसरात मंगळवारी (दि. २५) पहाटे एका महिलेवर अज्ञात व्यक्तीकडून अत्याचार करण्यात आला. या प्रकरणाची गंभीर दखल घेऊन परिवहनमंत्री प्रताप सरनाईक यांनी संबंधित बसस्थानकावरील कार्यरत असलेले स्थानकप्रमुख ( सहायक वाहतूक अधीक्षक) व आगार व्यवस्थापक यांची वरिष्ठ अधिकाऱ्यांमार्फत विभागीय चौकशी करून दोष आढळल्यास त्यांना तत्काळ निलंबित करावे, असे निर्देश उपाध्यक्ष व व्यवस्थापकीय संचालक (प्रभारी ) विवेक भीमनराव यांना दिले आहेत.बुधवारी पहाटे स्वारगेट बसस्थानकावर उभ्या असलेल्या शिवशाही एसटी बसमध्ये एका तरुणीवर अज्ञात व्यक्तीने अत्याचार केल्याची घटना घडली. यासंदर्भात संबंधित महिलेने स्वारगेट पोलिस स्थानकात तक्रार दाखल केली आहे. सदर घटनेची परिवहनमंत्री प्रताप सरनाईक यांनी गंभीर दखल घेतली असून, संबंधित बसस्थानकावरील त्यावेळी कर्तव्य असलेल्या स्थानकप्रमुख तसेच त्या आगाराचे प्रमुख यांची या प्रकरणी प्रवाशांच्या सुरक्षेसंदर्भात हलगर्जीपणा दाखविल्याबद्दल विभागनिहाय चौकशी करावी, त्या चौकशीमध्ये ते दोषी आढळल्यास त्यांना तत्काळ निलंबित करावे, असे निर्देश दिले आहेत.तसेच बसस्थानकावरील कार्यरत असलेले सर्व सुरक्षारक्षक यांना तत्काळ बदलण्यात यावे तसेच त्यांच्याऐवजी दुसऱ्या सुरक्षारक्षकांना नेमण्याची मागणी संबंधित सुरक्षा मंडळाला करावी, असे निर्देश दिले आहेत. या प्रकरणाचा सविस्तर अहवाल पुढील सात दिवसांत सादर करावा, अशा सूचना मंत्री सरनाईक यांनी एसटी महामंडळाचे उपाध्यक्ष व व्यवस्थापकीय संचालक (प्रभारी ) विवेक भीमनवार यांना दिल्या आहेत.महिला प्रवाशांच्या सुरक्षिततेला प्राधान्य‘महिला सन्मान योजनें’तर्गत महिलांना त्यांच्या प्रवास तिकिटामध्ये ५० टक्के सवलत दिली जाते. त्यामुळे महिलांची प्रवासी संख्या मोठ्या प्रमाणात वाढली आहे. याबरोबरच त्यांची सुरक्षितता हादेखील मुद्दा ऐरणीवर आलेला आहे. स्वारगेट बसस्थानकावरील घडलेल्या घटनेच्या पार्श्वभूमीवर परिवहनमंत्री प्रताप सरनाईक यांनी उद्या महिला प्रवाशांच्या सुरक्षिततेसंदर्भात एसटीच्या वरिष्ठ अधिकाऱ्यांची तत्काळ बैठक बोलावली आहे.