शिवशाही बसचे रूपांतर होणार निमआराम हिरकणीत; राज्यात ७९० बस मार्गावर, पुणे विभागात ८३

हिरकणी (निमआराम) बसेस पूर्वीप्रमाणे हिरव्या आणि पांढऱ्या रंगातच असणार आहेत

पुणे: महाराष्ट्र राज्य परिवहन महामंडळाच्या (एसटी) शिवशाही बसमधील एसीमुळे बस बंद पडण्याचे प्रमाण वाढत आहे. शिवाय एसीमुळे शिवशाहीला पिकअपसुद्धा मिळत नाही. तसेच प्रवाशांच्या वाढत्या तक्रारी आणि तांत्रिक कारणांमुळे शिवशाही बसचे रूपांतर आता हिरकणी बसमध्ये करण्यात येणार आहे. त्यामुळे राज्यातील ७९० शिवशाहीसह पुणे एसटी विभागातील ८३ शिवशाही बसचे रूपांतर हिरकणीत होणार असून, याबाबत संचालक मंडळाच्या बैठकीत निर्णय झाला आहे.

महाराष्ट्र राज्य परिवहन महामंडळाच्या ताफ्यात एसटी प्रवाशांना आरामदायी प्रवास करता यावा, यासाठी २०१७ मध्ये शिवशाही बस दाखल झाले. सुरुवातील या बसला प्रवाशांचा तुफान प्रतिसाद मिळत होता. परंतु कालांतराने देखभाल दुरुस्ती वेळेवर न झाल्याने या बस मार्गावर असताना वारंवार बंद पडू लागले. शिवाय बसमधील एसी बंद पडणे, अस्वच्छ असणे याच्या तक्रारी वाढत होते. यामुळे सध्या एसटी महामंडळाकडे संचलनात असलेल्या शिवशाही बसेसची टप्प्याटप्प्याने पुनर्बांधणी करून त्याचे रूपांतर हिरकणी (निमआराम) बसमध्ये करण्यात येणार आहे. तसेच त्या बसेस पूर्वीप्रमाणे हिरव्या आणि पांढऱ्या रंगातच बांधणी करण्यात येणार आहे. त्यामुळे महामंडळाच्या संचलनातील उपलब्ध असलेल्या राज्यातील सर्व शिवशाही बसचे आता हिरकणीत रूपांतर होणार आहे.

शिवाजीनगर, बारामती आगारात सर्वात जास्त 

पुणे विभागात स्वारगेट, शिवाजीनगर आणि बारामती या तीन आगारात शिवशाही बसची संख्या जास्त आहे. या सर्व बसचे टप्प्याटप्प्याने हिरकणीत रूपांतर करण्यात येणार आहे. त्यामुळे विभागात शिवशाही बस कमी होऊन हिरकणीची संख्या वाढणार आहे. ८३ शिवशाही बसपैकी ६० पेक्षा जास्त बस दैनंदिन मार्गावर धावतात.

सध्या एसटी महामंडळाकडे संचलनात असलेल्या शिवशाही बसची टप्प्याटप्प्याने पुनर्बांधणी करून त्याचे रूपांतर हिरकणी (निमआराम) बसमध्ये करण्यात येणार असून, त्या बसेस पूर्वीप्रमाणे हिरव्या आणि पांढऱ्या रंगातच असणार आहेत. - प्रताप सरनाईक, परिवहन मंत्री