माळेगाव: राष्ट्रवादीचे माजी सरपंच जयदीप दिलिप तावरे यांच्या अटकेच्या विरोधात माळेगांव येथे जनता रस्त्यावर उतरली आहे. या वेळी जयदिप तावरे यांच्या अटकेच्या निषेधार्थ गुरुवारी माळेगांव येथे पुकारण्यात आलेल्या बंदला मोठा प्रतिसाद मिळाला. दरम्यान गावात अनुचित प्रकार घडू नये यासाठी मोठा पोलिस बंदोबस्त तैनात करण्यात आला होता.
गोळीबार प्रकरणी रविराज तावरे यांनी दिलेल्या जबाबावरुन माजी सरपंच जयदीप दिलिप तावरे यांना पोलिसांकडून अटक करण्यात आली आहे. या अटकेच्या विरोधात जयदिप तावरे समर्थकांनी माळेगाव बंदसह निषेध सभा आयोजित केली होती. व्यापाऱ्यांनी आपली दुकाने बंद ठेवून बंदला उत्फुर्द प्रतिसाद दिला.
शिवाजी चौकात निषेध सभा झाली. ग्रामस्थांनी मोठी गर्दी केली होती. यावेळी संतोष जगताप, दादा जराड, राजेंद्र तावरे, दिलीप तावरे, आदींनी मनोगत व्यक्त केले. तसेच जयदीप तावरे यांच्या अटकेचा निषेध करण्यात आला. यावेळी पणदरे, धुमाळवाडी, निरावागज येथील युवक सहभागी झाले होते. समर्थकांनी पोलीस निरीक्षक महेश ढवाण यांना निवेदन दिले. दरम्यान या निषेध सभेत हजारो युवक उपस्थित होते.या सभेत जयदीप तावरे यांचे सर्व कुटुंब महिलांसह उपस्थित होते.यावेळी सर्व कुटुंबाच्या डोळ्यात अश्रू पहावयास मिळाले.