Zilla Parishad Election : अजितदादांना मोठा धक्का! राष्ट्रवादीने झेडपीसाठी उमेदवारी नाकारताच माजी आमदार पुत्राने ठोकला रामराम, भाजपच्या वाटेवर

राजेंद्र गावडे हे अजित पवार आणि विशेषतः दिलीप वळसे पाटील यांच्याशी एकनिष्ठ मानले जात होते.

पुणे/शिरूर: पुणे जिल्हा परिषद निवडणुकीच्या तोंडावर शिरूर तालुक्यातील राजकारणात मोठी उलथापालथ झाली आहे. माजी आमदार पोपटराव गावडे यांचे पुत्र आणि दिलीप वळसे पाटील यांचे अत्यंत जवळचे सहकारी राजेंद्र गावडे यांनी राष्ट्रवादी काँग्रेसला (अजित पवार गट) रामराम ठोकला आहे. जिल्हा परिषदेची उमेदवारी नाकारल्याने नाराज झालेल्या गावडेंचा आज पुण्यात भाजपमध्ये जाहीर प्रवेश होणार आहे.

राजेंद्र गावडे हे अजित पवार आणि विशेषतः दिलीप वळसे पाटील यांच्याशी एकनिष्ठ मानले जात होते. मात्र, राष्ट्रवादीने त्यांना जिल्हा परिषदेसाठी डावलल्यामुळे शिरूरच्या राजकीय वर्तुळात नाराजीचे सूर उमटले होते. आपल्या समर्थकांचा मोठा गट सोबत घेऊन गावडेंनी कमळ हाती घेण्याचा निर्णय घेतला आहे. यामुळे वळसे पाटलांच्या बालेकिल्ल्यात राष्ट्रवादीला मोठे भगदाड पडले आहे.

भाजपची शिरूरमध्ये ताकद वाढणार
राजेंद्र गावडे यांच्या भाजप प्रवेशामुळे शिरूरमधील महायुतीच्या गणितात आता भाजपची बाजू भक्कम झाली आहे. "पक्षात निष्ठेला किंमत मिळत नसल्याने आणि कार्यकर्त्यांच्या आग्रहामुळे हा निर्णय घेतल्याचे" गावडेंनी यावेळी सांगितले. पुण्यात झालेल्या या पक्षप्रवेशावेळी भाजपचे ज्येष्ठ नेते आणि शिरूरमधील प्रमुख पदाधिकारी उपस्थित होते.