ट्रिपलसीट जाताय, सावधान..! शहरात वाहतूक विभागाकडून १४५४ वाहनांवर कारवाई

- याशिवाय २१४४ चलन पेड करून १६ लक्ष १८ हजार ४०० रुपये शासनाच्या तिजोरीत जमा करण्यात आले आहेत.

पुणे : रस्त्यावरून बेधडकपणे ट्रिपलसीट जाणाऱ्या वाहनांवर वाहतूक विभागाने कारवाईचा बडगा उगारला असून, पोलिसांनी राबविलेल्या विशेष मोहिमेदरम्यान पुणे शहरातील विविध प्रमुख रस्ते, चौक व वाहतूक दाटीच्या ठिकाणी एकूण १४५४ ट्रिपलसीट वाहनांवर कारवाई केली आहे. याशिवाय २१४४ चलन पेड करून १६ लक्ष १८ हजार ४०० रुपये शासनाच्या तिजोरीत जमा करण्यात आले आहेत.

वाहतूक पोलिसांनी पोलीस आयुक्त अमितेश कुमार यांच्या आदेशानुसार व सहपोलीस आयुक्त व अपर पोलिस आयुक्त पूर्व प्रादेशिक विभाग यांचे मार्गदर्शनाखाली शहरातील रस्त्यांवर ट्रिपलसीट वाहनांवर कारवाईची विशेष मोहीम राबविण्यात आली. एकूण ५९२१ जणांवर चलन कारवाई करण्यात आली आहे. या मोहिमेमध्ये पुणे शहर वाहतूक विभागातील ३० वाहतूक विभाग तसेच ४४ पोलीस स्टेशन येथील अधिकारी व अंमलदार यांनी सक्रिय सहभाग घेतला.

या मोहिमेंतर्गत दुचाकी वाहनावर ट्रिपलसीटने प्रवास करणे हे कायद्याने गुन्हा आहे, ट्रिपलसीटमुळे अपघात होण्याची शक्यता वाढते व स्वतःसह इतर रस्ते वापरकर्त्यांच्या जीवितास धोका निर्माण होतो. नागरिकांनी वाहतूक नियमांचे पालन करावे, सुरक्षित व शिस्तबद्ध वाहनचालना करावी, असे आवाहन वाहतूक विभागाचे उपायुक्त हिम्मत जाधव यांनी केले आहे. शहरातील वाहतूक सुरळीत ठेवण्यासाठी व अपघातांचे प्रमाण कमी करण्यासाठी अशा प्रकारच्या विशेष मोहिमा पुढेही सातत्याने राबविण्यात येणार आहेत. असेही त्यांनी स्पष्ट केले आहे.