Pune Traffic : वाहतूक कोंडी सोडविण्यासाठीचा प्रकल्प पाहणीसाठी आलेले गडकरी ‘ट्रॅफिक’मध्ये अडकले

अखेर गडकरी यांनी चालकाला माघारी गाडी वळविण्यास सांगितले. वाहतूक काेंडीमुळे प्रकल्पाची पाहणी न करताच गडकरी यांना माघारी जावे लागले.

पुणे : शहरातील मध्यवर्ती ठिकाणी होणाऱ्या वाहतूक कोंडी सोडविण्यासाठी शनिवारवाडा ते स्वारगेट ‘चौपदरी भुयारी मार्ग’ प्रकल्पाची पाहणी करण्यासाठी आलेल्या केंद्रीय रस्ते वाहतूक आणि महामार्ग मंत्री नितीन गडकरी यांना वाहतूक कोंडीचा फटका बसला. अखेर गडकरी यांनी चालकाला माघारी गाडी वळविण्यास सांगितले. वाहतूक काेंडीमुळे प्रकल्पाची पाहणी न करताच गडकरी यांना माघारी जावे लागले.

पुणे शहराच्या मध्यवर्ती भागातील वाहतूक कोंडीचा प्रश्न कायमस्वरूपी निकाली काढण्यासाठी प्रस्तावित शनिवारवाडा ते स्वारगेट ‘चौपदरी भुयारी मार्ग’ करण्यात येणार आहे. या प्रकल्पाची पाहणी करण्यासाठी नितीन गडकरी सकाळी साडेदहा वाजता शनिवारवाड्याजवळ येऊन पाहणी करणार होते. मात्र, गडकरी यांचे विमानतळावर विलंबाने आगमन झाले. गडकरी ११ वाजून २५ मिनिटांनी कार्यक्रमस्थळी आल्याने महापालिकेकडून शनिवारवाड्याच्या दिशेने जाणारी वाहतूक आणि छत्रपती शिवाजी महाराज पुलाकडे जाणारी वाहतूक पोलिसांनी थांबवून ठेवली होती. गडकरी यांनी कार्यक्रमस्थळी येताच भारतीय जनसंघाचे संस्थापक श्यामाप्रसाद मुखर्जी यांना अभिवादन केले.

आमदार हेमंत रासने यांच्याकडून या प्रकल्पाची माहिती घेतली. त्यानंतर प्रकल्प पाहणीसाठी वाहनात बसून स्वारगेटच्या दिशेने जाण्यासाठी नितीन गडकरी निघाले. यावेळी आमदार हेमंत रासनेदेखील त्यांच्या वाहनात बसून मार्ग दाखविण्यासाठी निघाले. मात्र, सकाळची वेळ असल्याने दोन्ही वाहनांच्या दूरपर्यंत रांगा लागल्या होत्या. त्यातच वाहनचालकांनी जोरजोरात ‘हाॅर्न’ वाजविण्यास सुरुवात केल्याने पोलिसांनी पुढील मार्गावर प्रचंड वाहतूक कोंडी झाली असल्याचे गडकरींना सांगितले. अखेर गडकरी यांनी चालकाला माघारी गाडी वळविण्यास सांगितले अन् रासने गाडीतून खाली उतरले.