मी जमीन खरेदी केलेली नाही; माझे नाव कोणत्याही कागदपत्रात नाही - अभिनेत्री सोनाली बेंद्रे

सोनाली म्हणते, मावळमधील जमीन खरेदी केलेलीच नाही.. !मौजे-उकसान येथील जमीन खरेदी प्रकरण; पैसे उकळण्याचा आरोप

पुणे : मावळ जिल्ह्यातील मौजे-उकसान येथील सर्व्हे नं. १२१/१, क्षेत्र - ३० गुंठे या शेतजमिनीबाबत वडगाव मावळ येथील दिवाणी न्यायालयामध्ये प्रसिद्ध अभिनेत्री सोनाली बेंद्रे, तिचे पती गोल्डी रमेश बेहल व अन्य दोन व्यक्तींविरोधात चंद्रकांत बाळू शिंदे या मावळ तालुक्यातील स्थानिक शेतकऱ्याने दावा दाखल केला आहे.

यात चंद्रकांत बाळू शिंदे यांची वडिलोपार्जित कुळ हक्काची शेतजमीन नियमबाह्य पद्धतीने व कुळाचा हक्क डावलून सोनाली बेंद्रे यांचे पती गोल्डी रमेश बेहल यांनी परस्पर विकत घेतल्याचा आरोप त्यांनी केला आहे. मात्र, या दाव्यातील आरोप अभिनेत्री सोनाली बेंद्रे यांनी नाकारले आहेत. मी संबंधित जमीन खरेदी केलेली नसून, माझे नाव कोणत्याही कागदपत्रात नाही. केवळ पैसे उकळण्याच्या हेतूने हा सर्व खोटा प्रकार रचण्यात आलेला आहे, असा प्रत्यारोप सोनाली बेंद्रे यांनी केला आहे.

सोनाली बेंद्रे यांचे वकील ॲड. राजू शिंदे यांनी दिलेल्या माहितीनुसार, दि. ८ जून १९६५ रोजी तहसीलदार मावळ यांनी केसू बाबाजी शिंदे हा मालक नाही” असा स्पष्ट निकाल दिलेला आहे. त्यानंतर चंद्रकांत शिंदे यांनी तहसीलदार वडगाव मावळ यांच्याकडे अपील दाखल केले होते; परंतु ते अपील दि. ३१ ऑक्टोबर २०१८ रोजी नामंजूर करण्यात आले . यानंतर त्यांनी प्रकरण क्र. १४२/२०२२ अंतर्गत उपविभागीय अधिकारी (एसडीओ) मावळ यांच्याकडे अपील दाखल केले, तेही नामंजूर झाले.

त्यानंतर पुन्हा तहसीलदार वडगाव मावळ यांच्याकडे अपील दाखल केले, ते दि. ०१ ऑक्टोबर २०२५ रोजी नामंजूर करण्यात आले, तसेच पुन्हा उपविभागीय अधिकारी मावळ यांच्याकडे अपील दाखल करण्यात आले, मात्र हे प्रकरण न्यायप्रविष्ट आहे. वरील सर्व बाबींवरून संबंधित व्यक्ती वारंवार खोटे व निराधार अर्ज करून शासकीय कार्यालयांचा वेळ वाया घालवत आहे व केवळ आर्थिक लाभ (पैसे उकळणे) मिळवण्याच्या हेतूने हे सर्व प्रकार सुरू आहेत, असे स्पष्ट होते, तसेच कामशेत पोलिस स्टेशन येथेही वारंवार खोट्या व बनावट तक्रारी दाखल करण्यात येत आहेत. संबंधित जमीन खरेदी करताना त्या जमिनीत सोनाली बेंद्रे यांचे नाव कोणत्याही कागदपत्रात नाही. केवळ पैसे उकळण्याच्या हेतूने हा सर्व खोटा प्रकार रचण्यात आला असल्याचा आरोप त्यांनी केला आहे.