‘इंडियाज बिगेस्ट होळी’ वादात; ना पाेलिस परवानगी, ना पार्किंगची साेय; तरीही आयाेजित केला जाताेय ‘कॉन्सर्ट’

- नगर रस्त्यावरील नागरिक धास्तावले; करण औजला याच्या दिल्लीतील कार्यक्रमात झाला हाेता गाेंधळ 

पुणे : खराडी येथील महालक्ष्मी लॉन्स येथे ‘इंडियाज बिगेस्ट होळी’ कार्यक्रम मंगळवारी (दि.३) होणार आहे. यासाठी कॅनेडियन पंजाबी गायक करण औजला उपस्थित राहणार आहे. या कार्यक्रमास माेठी गर्दी हाेण्याची शक्यता असून, पार्किंगची पुरेसी व्यवस्था नसल्याने नागरिक आपली वाहने नगर रस्त्यावर लावण्याची शक्यता आहे.

विशेष म्हणजे औजला याच्या दिल्लीतील कार्यक्रमात गाेंधळ झाल्याची घटना ताजी असताना आणि कार्यक्रमास पाेलिस परवानगी नसतानाही आयाेजक दहा ते पंधरा हजार चाहत्यांची गर्दी जमवण्याची धडपड करत आहेत. हा सर्व प्रकार पाहून स्थानिक नागरिक तीव्र चिंता व्यक्त करत आहेत.

दरम्यान, करण औजला याच्या शनिवारीच दिल्लीत झालेल्या कार्यक्रमादरम्यान गोंधळ, हाणामारीचा प्रकार घडला हाेता. अपुरी पार्किंग व्यवस्था आणि वाहतूककोंडी आदींचा सामना चाहत्यांना करावा लागला हाेता. त्यामुळे तीव्र नाराजी पसरली हाेती. आता पुण्यात होणाऱ्या आगामी कॉन्सर्टबाबतही तिच भीती व्यक्त केली जात आहे.

या कार्यक्रमासाठी सुमारे १० ते १५ हजार नागरिक उपस्थित राहणार आहेत; पण पार्किंगची व्यवस्था नसल्याने प्रचंड वाहतूक कोंडी होण्याच्या भीतीने नगर रस्त्यावरील नागरिक धास्तावले आहेत. या कार्यक्रमाचे आयोजन बिग ड्रीम एंटरटेनमेंटचे आर्यन नवले यांच्याकडून करण्यात आले असून, कॅनेडियन टॉप रेटेड पंजाबी गायक, रॅपर आणि गीतकार करण औजला यांची विशेष उपस्थिती असणार आहे. कार्यक्रमाची जाहिरात मोठ्या प्रमाणावर होत असली तरी स्थानिक नागरिकांनी संभाव्य वाहतूक कोंडीबाबत तीव्र चिंता व्यक्त केली आहे.

वाहने पार्क करणार कुठे ?

खराडी परिसरातील महालक्ष्मी लॉन्स येथे मंगळवारी (दि.३) करण औजला याच्या कॉन्सर्टचे आयाेजन केले आहे. या लॉन्सची एकूण जागा सुमारे १५ एकर असल्याचे सांगितले जाते. मात्र, स्थानिकांच्या म्हणण्यानुसार, त्यापैकी सुमारे १२ एकर जागेत सध्या खोदकाम झालेले असून, मातीचे ढिगारे आहेत. त्यामुळे पार्किंगसाठी प्रत्यक्षात केवळ तीन एकर जागा उपलब्ध असल्याचा दावा केला जात आहे. या मर्यादित जागेत पार्किंगची व्यवस्था करणार कशी ? उर्वरित वाहने पार्क करणार कुठे ?, असा सवाल नागरिकांकडून उपस्थित केला जात आहे.

...तर जबाबदार काेण?

सध्या कार्यक्रमासाठी स्टेज आणि टेंट उभारण्याचे काम सुरू असून, सुमारे १५ हजार प्रेक्षक कॉन्सर्टला उपस्थित राहण्याची शक्यता वर्तविली जात आहे. मात्र, वाहनतळाबाबत कोणतेही ठोस नियोजन नाही. परिणामी, कॉन्सर्टसाठी येणारे चाहते नगर रस्त्यावर दोन्ही बाजूंनी वाहने उभी करण्याची शक्यता आहे. आधीच खराडी ते वाघोलीदरम्यान या मार्गावर मोठी वाहतूक असते. त्यात रस्त्यावरच पार्किंग झाल्यास गंभीर वाहतूक कोंडी हाेण्याची शक्यता आहे. तसेच दिल्ली येथील घटनेच्या पार्श्वभूमीवर चाहत्यांमध्ये काही हाणामारीचा प्रकार घडलाच तर जबाबदारी काेण घेणार ? असाही प्रश्न उपस्थित हाेत आहे.

इंडियाज बिगेस्ट होळी या खराडी येथील महालक्ष्मी लॉन्स येथे होणाऱ्या कार्यक्रमाला अद्यापपर्यंत आमच्याकडून कोणतीही परवानगी देण्यात आलेली नाही.  - संजय पाटील, अपर पोलिस आयुक्त, प्रशासन.