पाणीपट्टी वसुलीत खडकवासला प्रकल्प राज्यात अव्वल

- ३१ मार्च अखेर ४४६ कोटी रुपयांची पाणीपट्टी जमा, पुणे महापालिकेकडून २५१ कोटी जमा 

पुणे : जलसंपदा विभागाला उत्पन्नाचा प्रमुख स्रोत असलेल्या पाणीपट्टीच्या वसुलीत पुणे विभागातील खडकवासला कार्यकारी अभियंता कार्यालयाने राज्यात अव्वल क्रमांक पटकावला आहे. खडकवासला प्रकल्पाच्या एकूण थकबाकीचे उद्दिष्ट ४६२ कोटी रुपये होते. त्यापैकी सुमारे ४४६ कोटी रुपयांची वसुली केली आहे. त्या खालोखाल ठाणे कार्यकारी अभियंता विभागात ३०० कोटी, तर हिंगोली विभागात १८० कोटींची वसुली केली होती. दरम्यान पुणे महापालिकेकडून २५१ कोटी, तर पिंपरी महापालिकेकडून सुमारे ७७ कोटी रुपयांची वसुली करण्यात केली आहे. 

जलसंपदामंत्री राधाकृष्ण विखे पाटील यांनी पाणीपट्टी वसुलीवर लक्ष केंद्रित करण्याचे आदेश दिले होते. तसेच मार्च अखेर १०० टक्के वसुलीचे उद्दिष्ट दिल्याने अधिकाऱ्यांनी कंबर कसली होती. खडकवासला प्रकल्पात यंदाची बिगर सिंचनाची पाणीपट्टी एकूण ४५८ कोटी तर सिंचनाची पाणीपट्टी ३ कोटी ५८ लाख रुपये होती. त्यानुसार पुणे महापालिकेकडे असलेल्या ९४८ कोटी रुपयांच्या पाणीपट्टी थकबाकी वसुलीसाठी खडकवासला प्रकल्पाच्या कार्यकारी अभियंता कार्यालयाने पाणी तोडण्याचा इशारा दिला होता. त्यानंतर महापालिकेने ३१ मार्च अखेर २०२ कोटी रुपयांची पाणीपट्टी जमा केली आहे. या रकमेवर ४९ कोटी रुपयांची रक्कम समायोजित करण्यात आली. त्यानुसार ही पाणीपट्टी २५१ कोटी रुपयांची रक्कम जमा केली आहे. 

तसेच पिंपरी चिंचवड महापालिकेकडून ५६ कोटी ९० लाख रुपयांची वसुली करण्यात आली. या रकमेवर २० कोटी रुपयांची रक्कम समायोजित करून एकूण वसुली ७६ कोटी ९० लाख रुपयांची झाली आहे. तसेच चिंचवड, हिंजवडी, कुरकुंभ या तीन एमआयडीसी कार्यालयांकडून एकूण ५० कोटी रुपयांची पाणीपट्टी वसुली करण्यात आली आहे. एकूण बिगर सिंचनाची ४४१ कोटी ६४ लाख रुपयांची पाणीपट्टी वसुली झाली आहे. तर सिंचनाची वसुली ४ कोटी ३ लाख रुपये झाली आहे.

खडकवासला कार्यकारी अभियंता कार्यालयाला ४६१ कोटी रुपयांची थकबाकी वसूल करण्याचे उद्दिष्ट दिले होते. त्यापैकी ४४६ कोटी रुपयांची वसुली करण्यात आली. राज्यातील ही सर्वाधिक वसुली ठरली आहे. त्यानंतर ठाण्यात ३०० कोटी तर हिंगोलीत १८० कोटी रुपयांची थकबाकी वसुली केली. - किरण देशमुख, कार्यकारी अभियंता, खडकवासला प्रकल्प