जलजीवन योजनेंतर्गत पाणीपुरवठा योजनांची कामे वेळेत पूर्ण करा

जलजीवन मोहिमेची प्रभावी अंमलबजावणीसाठी जिल्हाधिकारी कार्यालयात आयोजित जिल्हा पाणी व स्वच्छता मिशनची बैठकीत ते बोलत होते.

पुणे : जलजीवन योजनेंतर्गत पाणीपुरवठा योजनांची भौतिक पूर्णता पूर्ण करून मंजुर पाणीपुरवठा योजनांची कामे वेळेत पूर्ण करून भौतिकदृष्ट्या कार्यान्वित करण्याचे निर्देश जिल्हाधिकारी जितेंद्र डुडी यांनी दिले.

जलजीवन मोहिमेची प्रभावी अंमलबजावणीसाठी जिल्हाधिकारी कार्यालयात आयोजित जिल्हा पाणी व स्वच्छता मिशनची बैठकीत ते बोलत होते. यावेळी जिल्हा परिषदेचे प्रभारी मुख्य कार्यकारी अधिकारी चंद्रकांत वाघमारे यांच्यासह महाराष्ट्र जीवन प्राधिकरण भूजल सर्वेक्षण व विकास यंत्रणेचे अधिकारी उपस्थित होते.

डुडी म्हणाले, “ हर घर नल योजनेअंतर्गत प्रत्येक लाभार्थी कुटुंबाला नळाद्वारे पिण्याच्या पाण्याचा पुरवठा सुनिश्चित करण्यावर भर देण्यात आला. प्रलंबित एफएचटीसी असलेल्या योजनांना प्राधान्य देण्यात यावे. ज्या योजनांमध्ये नळ जोडणी अद्याप प्रलंबित आहेत, त्या योजना तातडीने पूर्ण कराव्यात.” योजनांची अंमलबजावणी करतांना उद्भवणारे जमीन विषयक प्रश्न, पाणीपुरवठा योजना राबविताना येणाऱ्या भूसंपादन व परवानगीबाबत अडचणी तत्काळ समन्वयाने सोडवून कार्यवाही करावी. याबाबत सर्व यंत्रणांनी परस्पर समन्वय राखून जल जीवन मोहिमेची उद्दिष्टे वेळेत पूर्ण करण्याबाबत ठोस कार्यवाही करण्याचे निर्देशही त्यांनी दिले.