Video : पुण्यात कमर्शियल गॅस बंद; गर्ल्स हॉस्टेलच्या मेसमध्ये चक्क चुलीवर स्वयंपाक

या मेसमध्ये दररोज सुमारे दोनशेहून अधिक मुलींसाठी जेवण बनवले जाते.

पुणे : शिक्षण, नोकरी आणि व्यवसायासाठी राज्याच्या विविध भागांतून तसेच देशभरातून अनेक तरुण-तरुणी पुणे शहरात येतात. त्यांच्यासाठी शहरभरात अनेक मेस आणि हॉस्टेलची व्यवस्था करण्यात आलेली आहे. मात्र सध्या कमर्शियल गॅसचा पुरवठा बंद झाल्यामुळे काही मेस चालकांना मोठ्या अडचणींना सामोरे जावे लागत आहे.

शहरातील जंगली महाराज रोड परिसरातील एका गर्ल्स हॉस्टेलमधील मेसमध्ये कमर्शियल गॅस उपलब्ध नसल्याने चक्क चुलीवर स्वयंपाक करण्याची वेळ आली आहे. या मेसमध्ये दररोज सुमारे दोनशेहून अधिक मुलींसाठी जेवण बनवले जाते. गॅस नसल्याने मोठ्या प्रमाणावर स्वयंपाक करणे अवघड ठरत असून, मेस चालकांनी पर्याय म्हणून पारंपरिक चुलीचा आधार घेतला आहे.

मेस व्यवस्थापनाच्या मते, अचानक कमर्शियल गॅसचा पुरवठा थांबल्याने स्वयंपाक व्यवस्थेवर परिणाम झाला आहे. तरीही मुलींच्या जेवणाची गैरसोय होऊ नये म्हणून कर्मचाऱ्यांनी चुलीवर स्वयंपाक करण्याचा निर्णय घेतला. मात्र या पद्धतीने स्वयंपाक करताना वेळ जास्त लागत असून, धूर आणि इतर अडचणींचाही सामना करावा लागत आहे.  दरम्यान, विद्यार्थिनींना वेळेत आणि नियमित जेवण मिळावे यासाठी मेस चालक प्रयत्न करत असले तरी कमर्शियल गॅसचा पुरवठा लवकर सुरू व्हावा, अशी मागणी मेस चालकांकडून करण्यात येत आहे.