जलपर्णीच्या फुलांनी बहरली भीमा; हातवळण येथे निसर्गरम्य दृश्य पाहण्यासाठी पर्यटकांची गर्दी

या मनमोहक दृश्याचा आनंद घेण्यासाठी परिसरातील ग्रामस्थांसह बाहेरील पर्यटकही मोठ्या संख्येने येथे भेट देत असल्याचे चित्र सध्या दिसून येत आहे.

वरवंड : दौंड तालुक्यातील हातवळण येथील भीमा नदी सध्या जलपर्णीच्या विळख्यात अडकली असली तरी त्या जलपर्णीवर उमललेल्या आकर्षक जांभळट फुलांमुळे परिसरात नयनरम्य दृश्य निर्माण झाले आहे. या मनमोहक दृश्याचा आनंद घेण्यासाठी परिसरातील ग्रामस्थांसह बाहेरील पर्यटकही मोठ्या संख्येने येथे भेट देत असल्याचे चित्र सध्या दिसून येत आहे.

भीमा नदीच्या पाण्यावर दाट प्रमाणात पसरलेल्या जलपर्णीमध्ये उमललेली जांभळट फुले नदीकाठाला वेगळेच सौंदर्य प्रदान करत आहेत. विशेषतः सकाळ आणि सायंकाळच्या वेळेत हे दृश्य अधिक खुलून दिसत असल्याने अनेक जण खास त्या वेळेत येथे येत आहेत. कुटुंबासोबत फिरणे, मित्रमंडळींसोबत वेळ घालवणे तसेच निसर्ग छायाचित्रणासाठी हे ठिकाण आकर्षणाचे केंद्र बनले आहे.

युवक-युवतींमध्ये या ठिकाणाबद्दल विशेष उत्सुकता दिसून येत असून सेल्फी काढणे, रील्स आणि व्हिडिओ तयार करून ते फेसबुक, इन्स्टाग्राम, व्हॉट्सॲप यांसारख्या सोशल मीडियावर शेअर करण्याचा ट्रेंड वाढला आहे. त्यामुळे हातवळण येथील भीमा नदी परिसराची ओळख अधिक व्यापक स्तरावर पोहोचत असल्याचे दिसून येते. मात्र, जलपर्णीचे वाढते प्रमाण नदीच्या नैसर्गिक प्रवाहाला अडथळा ठरत असून जलप्रदूषण आणि जैवविविधतेवर त्याचा परिणाम होण्याची शक्यता व्यक्त केली जात आहे. पाण्यातील ऑक्सिजनचे प्रमाण कमी होऊन मासेमारी व्यवसायावरही त्याचा विपरीत परिणाम होऊ शकतो, अशी भीती स्थानिकांनी व्यक्त केली आहे.

दरम्यान, पर्यटकांची वाढती गर्दी लक्षात घेता परिसरात कोणतीही विशेष सुरक्षा व्यवस्था नसल्याने काही प्रमाणात धोका निर्माण होण्याची शक्यता आहे. त्यामुळे प्रशासनाने जलपर्णी हटविण्यासाठी तातडीने उपाययोजना कराव्यात तसेच पर्यटकांसाठी आवश्यक सुरक्षा व स्वच्छता सुविधा उपलब्ध करून द्याव्यात, अशी मागणी स्थानिक नागरिकांकडून होत आहे.