समाविष्ट ३२ गावांमध्ये होणार ३२ दर्जेदार रस्ते होणार

- महापालिकेच्या अंदाजपत्रकात दैनंदिन कामांसाठी ३०० कोटींची तरतूद

पुणे : महापालिका हद्दीत नव्याने समावेश झालेल्या ३२ गावांमध्ये प्रत्येकी एक असे ३२ रस्ते दर्जेदार स्वरूपाचे करण्याचे नियोजन महापालिकेच्या सन २०२६-२७ च्या अंदाजपत्रकात करण्यात आले आहे. याशिवाय गावांमधील दैनंदिन व्यवस्थापन आणि प्राथमिक कामांसाठी ३०० कोटींची तरतूद केली आहे. ही तरतूद प्रकल्पांच्या निधीशिवाय असल्याचे महापालिका आयुक्त नवल किशोर राम यांनी स्पष्ट केले.

महापालिका आयुक्तांनी सोमवारी सन २०२६-२७ या आर्थिक वर्षाचे अंदाजपत्रक स्थायी समितीला सादर केले. या अंदाजपत्रकात महापालिका हद्दीत समावेश झालेल्या ३२ गावांमधील नागरिकांच्या सोयी व सुविधांसाठी स्वतंत्र अशी तरतूद केली आहे. 

महापालिकेने गावांच्या पाणीपुरवठ्यासाठी ३५० कोटींच्या योजनांचे नियोजन केले असून रस्ते विकासाठी ११० तर मलनिस्सारणाच्या व्यवस्थापनासाठी ७५० कोटींचे प्रकल्प हाती घेतले आहे. प्रकल्पीय तरतूद सोडून महापालिकेच्या २०२६-२७ च्या अंदाजपत्रकात दैनंदिन व्यवस्थापन व प्राथमिक कामांसाठी ३०० कोटींची तरतूद केली आहे. या अंदाजपत्रकामध्ये समाविष्ट प्रत्येक गावात प्रत्येकी एक रस्ता दर्जेदार व प्रशस्त करण्याचे प्रस्तावित केले आहे.