हुल्लडबाजांच्या दुचाकी पुलावर आल्याने गर्दी झाली अन् होत्याचे नव्हते झाले!

कुंडमळा येथे रविवारी जुना पूल कोसळून चौघांचा मृत्यू झाला, तर ५० जण जखमी झाले.

सचिन ठाकर
लोकमत न्यूज नेटवर्क

पवनानगर (जि. पुणे) : कुंडमळा येथे रविवारी जुना पूल कोसळून चौघांचा मृत्यू झाला, तर ५० जण जखमी झाले. पुलाच्या दोन्ही बाजूंनी दुचाकीस्वार पर्यटकांनी हुल्लडबाजी करत प्रवेश केला. त्यावेळी पुलावरच्या गर्दीत अनेकजण अडकले. त्यांचा प्रचंड भार पुलावर आल्याने काही क्षणातच पूल कोसळल्याचे प्रत्यक्षदर्शींनी सांगितले.

रविवार असल्याने मोठ्या प्रमाणात पर्यटक जमले होते. भार सहन झाल्याने पुलाचा काही भाग दगडांवर, तर काही भाग थेट पाण्यात कोसळल्याने बऱ्याच जणांना गंभीर दुखापती झाल्या. काही किरकोळ जखमींवर प्राथमिक उपचार करून घरी सोडले आहे, तर काहींची प्रकृती चिंताजनक आहे.

आम्ही सात मित्र फिरायला आलो होतो. पुलावर गर्दी होती. दुचाकीस्वार ये-जा करत होते. अचानक पूल कोसळला. मी दगडावर आपटलो, पाय व कंबरेला दुखापत झाली. तशा अवस्थेत मी दोघांना बाहेर काढले, अशी माहिती विजय संतोष येणकर (जखमी) यांनी दिली.

मी चाकणमधील कंपनीत काम करतो. मित्रांसोबत फिरायला आलो होतो. पुलावर उभी असतानाच पूल खाली पडला. मी पाण्यात पडलो. लोकांच्या मदतीने बाहेर आलो. त्यानंतर बेशुद्ध झालो. आता रुग्णालयामध्ये उपचार घेत आहे, असे प्रथमेश पालकर (जखमी) म्हणाले.

तळेगावला मुलीला भेटायला आलो होतो. तेथून कुंडमळा येथे गेलो असता अचानक पुलावर गर्दी झाली आणि पूल कोसळला. डोक्याला मार लागला. पतीचा पाय लोखंडी पाइपमध्ये अडकला, तर मुलीला खरचटले, असे  वैशाली वैभव उपाध्ये (जखमी) यांनी सांगितले.

कासारवाडीहून फिरायला आले होते. हुल्लडबाजी करणाऱ्या तरुणांनी मोठ्या आवाजात हॉर्न वाजवत दुचाकी पुलावर आणल्या. अचानक पूल कोसळला. माझ्या अंगावर दुचाकी पडली. माझ्या पाठ व पायाला दुखापत झाली, असे या दुर्घटनेतून थोडक्यात बचावलेल्या शिल्पा भंडारेलू यांनी म्हटले.

गर्दीचे वजन न पेलल्यानेच पूल नदीत कोसळला
इंद्रायणी नदीवरील कुंडमळा येथील साकव पुलावर गर्दी झाली आणि वजन न पेलवल्याने पूल कोसळला आहे. दुर्घटनेआधीचे छायाचित्र सोशल मीडियावर व्हायरल झाले आहे. त्यातून गर्दीमुळेच अपघात झाल्याचे दिसून येत आहे. मात्र, या छायाचित्राबाबत अधिकृत दुजोरा मिळू शकलेला नाही. पावसाळ्यात या पुलावर गर्दी जमते. रविवारीही पुलाच्या दोन्ही बाजूंनी मोठी गर्दी झाली होती. पर्यटकांबरोबरच दुचाकी वाहने उभी केली होती. त्यामुळे वजन न पेलवल्याने पूल तुटून पाण्यात कोसळल्याचे दिसून येत आहे. 

लोखंडी सांगाडा अद्याप नदीपात्राच्या खोल भागातच
मावळ तालुक्यात इंद्रायणी नदीवरील कुंडमळा येथील जुना पूल कोसळून रविवारी चारजणांचा मृत्यू झाला. एनडीआरएफच्या पथकांकडून रात्री अकरापर्यंत बचावकार्य सुरू होते. त्यानंतर सोमवारी सकाळी साडेनऊपासून पुन्हा शोध मोहीम सुरू करण्यात आली. नदीपात्रात दोन ड्रोनच्या साहाय्याने शोध घेण्यात आला.दुर्घटनेतील चार मृतदेह पाण्यातून बाहेर काढण्यात आले. यामध्ये ५१ जण जखमी झाले आहेत. स्थानिकांनी तीन जणांना, तर बचाव पथकांनी पुलाखाली अडकलेल्या एका व्यक्तीला वाचविले. दरम्यान, पुलाचा लोखंडी सांगाडा नदीपात्राच्या खोल भागातून काढण्यात पाण्याच्या प्रवाहाचा आणि पावसाचा अडथळा होत होता. काही भाग कटरने कापण्यात आला. त्यानंतर सांगाडा पाण्यातून वर उचलण्यात आला. मात्र, तो पूर्णपणे नदीपात्रातून बाहेर काढण्यात आलेला नाही. पाऊस थांबल्यानंतर कटरने तोडून तो काढण्यात येणार आहे.

पोलिस बंदोबस्त तैनात
बघ्यांची तोबा गर्दी होत असल्याने पोलिसांनी खबरदारी म्हणून घटनास्थळी बॅरिकेड्स लावले आहेत. तळेगाव दाभाडे पोलिस ठाणे आणि राखीव दलाचे जवान बंदोबस्तासाठी तैनात केले आहेत. रायगडच्या व स्थानिक बचाव पथकांकडून शोधकार्य सुरू आहे. मनाई आदेशाची अंमलबजावणी सुरू आहे.