LPG Gas Crisis : गॅस टंचाईमुळे मातीच्या चुलींना पुन्हा मागणी; घोडेगावातील कारागिरांना कामाला उभारी 

घोडेगावमध्ये आजही कोणतीही यंत्रसामग्री न वापरता पूर्णपणे हाताने मातीच्या चुली तयार केल्या जातात.

घोडेगाव : गॅस टंचाई वाढल्याने ग्रामीण भागात पुन्हा मातीच्या चुलींना मागणी वाढली असून घोडेगाव येथे चुली बनविणाऱ्या कारागिरांच्या कामाला सध्या चांगलीच उभारी मिळाली आहे. पारंपरिक पद्धतीने माती व शेणापासून बनविल्या जाणाऱ्या चुलींसाठी ग्राहकांकडून मोठी मागणी होत आहे.

सध्या दोन ठिकाणांहून जाळ निघणारी अवलाची चूल सुमारे ३०० रुपयांना, तर एकाच ठिकाणाहून जाळ निघणारी सडीची चूल सुमारे २०० रुपयांना उपलब्ध आहे. याशिवाय गॅस शेगडीवर ठेवता येणाऱ्या चुली व तंदूरही येथे तयार केले जात आहेत.

घोडेगावमध्ये आजही कोणतीही यंत्रसामग्री न वापरता पूर्णपणे हाताने मातीच्या चुली तयार केल्या जातात. अनेकांना आजही चुलीवरच्या भाकरीची चव आवडत असल्याने घरात गॅस असला तरी ग्रामीण भागातील लोक चुली घेऊन जातात. तसेच गॅस टंचाईमुळे चुलींची मागणी वाढल्याने चुली बनविण्याचे कामही वाढले असल्याचे कारागीर सुधाकर सोमवंशी यांनी सांगितले.