Pune Grand Tour 2026: 'त्या नटीनं मारली मिठी'; विदेशी सायकलपटूंना मराठी गाण्याची भुरळ

लोकप्रिय मराठी गाणं 'नटीनं मारली मिठी' नं अक्षरशः वेड लावलं. या गाण्याच्या ठेक्यावर विदेशी खेळाडूंनी मनसोक्त डान्स केला

पुणे -  पुणे ग्रँड टूर आंतरराष्ट्रीय सायकल स्पर्धेच्या समारोपाने आज पुणेकरांना एक अविस्मरणीय क्षण अनुभवायला मिळाला. खेळासोबतच मराठी संस्कृतीचा रंगतदार ठसा उमटवत, स्पर्धेच्या अंतिम दिवशी सहभागी झालेले विदेशी सायकलपटू लोकप्रिय मराठी गाणं ‘नटीनं मारली मिठी’ च्या तालावर मनमुराद थिरकताना पाहायला मिळाले.

'त्या नटीनं मारली मिठी'; विदेशी सायकलपटूंना मराठी गाण्याची भुरळ
स्पर्धेच्या अंतिम टप्प्यात सहभागी झालेल्या परदेशी सायकलपटूंना लोकप्रिय मराठी गाणं 'नटीनं मारली मिठी' नं अक्षरशः वेड लावलं. #pune@Bajaj#marathi#marathisongpic.twitter.com/6RpZrcfrGs

— Lokmat (@lokmat) January 23, 2026

स्पर्धेनंतरच्या आनंदोत्सवात अचानक वाजलेल्या या मराठमोळ्या गाण्याने परदेशी खेळाडूंना अक्षरशः वेड लावलं. पारंपरिक ठेक्यांवर त्यांनी केलेला उत्स्फूर्त डान्स उपस्थित प्रेक्षकांसाठी विशेष आकर्षण ठरला. या आनंदी क्षणांचा व्हिडिओ सध्या सोशल मीडियावर जोरदार व्हायरल होत असून नेटकऱ्यांकडून मोठ्या प्रमाणात पसंती मिळत आहे.

व्हिडिओमध्ये विविध देशांतील सायकलपटू मराठी गाण्याच्या तालावर एकत्र नाचताना दिसत असून “मराठी संस्कृतीची जादू”, “पुणेकरांची खासियत” अशा प्रतिक्रिया युजर्सकडून व्यक्त केल्या जात आहेत. काही तासांतच या व्हिडिओवर हजारो लाईक्स आणि शेअर्स झाले आहेत.

पुणे ग्रँड टूर स्पर्धेमुळे पुण्याची ओळख केवळ क्रीडानगरी म्हणून नव्हे, तर संस्कृती जपणारे शहर म्हणूनही आंतरराष्ट्रीय स्तरावर अधोरेखित झाली आहे. खेळ आणि संस्कृतीचा हा अनोखा संगम पुणेकरांसाठी अभिमानास्पद ठरत आहे.