खराडीतील कॉल सेंटरवरील कारवाईत पेनड्राइव्ह जप्त

खराडी-मुंढवा रस्त्यावरील प्राइड आयकॉन या इमारतीच्या ९ व्या मजल्यावर हे कॉल सेंटर सुरू होते. याप्रकरणी पाच जणांना अटक करण्यात आली.

पुणे : अमेरिकन नागरिकांना डिजिटल अरेस्ट करण्याची भीती दाखवून लाखो रुपयांची फसवणूक करणाऱ्या खराडी येथील कॉल सेंटरचा पर्दाफास केल्यानंतर पोलिसांनी त्या अनुषंगाने गुजरात व राजस्थान येथे छापे टाकले. या छाप्यांमध्ये घेतलेल्या घरांच्या झडतीमध्ये पुणे पोलिसांना तीन पेनड्राइव्ह, इलेक्ट्रॉनिक वस्तू व कागदपत्रे मिळाली आहेत.

खराडी-मुंढवा रस्त्यावरील प्राइड आयकॉन या इमारतीच्या ९ व्या मजल्यावर हे कॉल सेंटर सुरू होते. याप्रकरणी पाच जणांना अटक करण्यात आली. अटक केलेले आरोपी हे गुजरात, राजस्थान या राज्यातील असून, बहुतांश कर्मचारी हे परराज्यातील आहेत. कॉल सेंटरचा मालक करणसिंग शेखावत (२८, रा. अहमदाबाद), संजय मोरे आणि केतन हे तिघे पसार झाले आहेत.

शेखावत हा मुख्य सूत्रधार असल्याचे तपासात उघडकीस आले. पसार झालेल्या आरोपींचा शोध घेण्यासाठी पोलिसांनी पथके तयार केली आहेत. पोलिस उपायुक्त निखिल पिंगळे यांच्या मार्गदर्शनाखाली गुन्हे शाखेच्या युनिट चारच्या पथकाने रविवारी नवी मुंबईत छापे टाकले, तसेच दुसऱ्या एका टीमने अहमदाबाद येथे लक्ष्मण अमरसिंग शेखावत (वय २८, रा. अहमदाबाद) याच्या घराची झडती घेतली त्यामध्ये ३ पेनड्राइव्ह मिळून आले, तसेच सरजितसिंग गिरवरसिंग शेखावत (वय २५ वर्षे, रा. सेहीकला राजस्थान) याच्या घरातून काही इलेक्ट्रॉनिक वस्तू व कागदपत्रे जप्त केली आहेत.