विमाननगरमध्ये मसाज सेंटरच्या नावाखाली वेश्या व्यवसाय; आठ तरुणींची सुटका

मसाज सेंटरच्या मालकासह ९ जणांविरोधात गुन्हा दाखल

पुणे: मसाज सेंटरमध्ये एक्स्ट्रा सर्व्हिसच्या नावाखाली विमाननगरमध्ये वेश्या व्यवसाय सुरू असल्याचे सामाजिक सुरक्षा विभागाने उघडकीस आणले आहे. मसाज सेंटरच्या मालकासह ९ जणांविरोधात गुन्हा दाखल केला असून आठ पीडित तरुणींची सुटका करण्यात आली आहे.

मसाज सेंटरमधील व्यवस्थापक हिना अकबरअली सय्यद (वय ३०, रा. लोहगाव), सहायक व्यवस्थापक ताजुल इस्लाम अब्दुल वाहीद (वय ३३, रा. विमाननगर) व फारुख अहमद, बदुल अहमद (वय ३२, रा. विमाननगर) यांना अटक करण्यात आली. मसाज सेंटरचा मालक सुरेश बाबुलाल परदेशी (रा. कसबा पेठ), संदीप शरदचंद्र सहस्त्रबुद्धे (रा. श्रीकृष्ण कॉलनी, काळेवाडी), अविनाश खिंवसरा (रा. कसबा पेठ), मसाज सेंटरसाठी जागा उपलब्ध करून देणारे मालक अविनाश भाऊसाहेब साकोरे, भाऊसाहेब साकोरे यांच्यासह आणखी एका विरोधात गुन्हा दाखल करण्यात आला आहे.

विमाननगरमधील एका इमारतीत ॲटमॉस्पिअर युनिसेक्स हेअर अँड ब्युटी स्टुडिओत मसाज सेंटरच्या नावाखाली वेश्या व्यवसाय सुरू असल्याची माहिती सामाजिक सुरक्षा विभागाला मिळाली. त्यानंतर बनावट ग्राहकाच्या माध्यमातून खातरजमा करण्यात आली. पोलिसांच्या पथकाने तेथे छापा टाकून आठ तरुणींना ताब्यात घेतले. मसाज सेंटरच्या व्यवस्थापकांसह तिघांना अटक करण्यात आली. या कारवाईत रोकड तसेच अन्य साहित्य असा १ लाख ६१ हजारांचा मुद्देमाल जप्त करण्यात आला.