राज्यभरात १५ फेब्रुवारीपासून एमएस-सीआयटी केंद्रांवर ‘प्रज्ञाशोध’ परीक्षा 

‘भाषा’ संस्थेतर्फे गेली बारा वर्षे घेतल्या जाणाऱ्या ‘मराठी भाषा ऑलिम्पियाड’ परीक्षेची ही दुसरी, वरिष्ठ पातळी आहे.

पुणे : ‘भाषा’ संस्था व महाराष्ट्र नॉलेज कॉर्पोरेशन लिमिटेड (एमकेसीएल) यांच्या संयुक्त विद्यमाने ‘मराठी भाषा प्रज्ञाशोध’ ही राज्यस्तरीय परीक्षेचे आयोजन करण्यात आले आहे. ही परीक्षा राज्यभरातील अधिकृत एमएस-सीआयटी केंद्रांवर रविवार, दि. १५ ते २२ फेब्रुवारी दरम्यान सकाळी १० ते सायंकाळी पाच यावेळेत होणार आहे. मराठी भाषेतील प्रावीण्य शोधण्यासाठी हा उपक्रम राबविण्यात येणार असण्याची माहिती

‘भाषा’ संस्थेतर्फे गेली बारा वर्षे घेतल्या जाणाऱ्या ‘मराठी भाषा ऑलिम्पियाड’ परीक्षेची ही दुसरी, वरिष्ठ पातळी आहे. पहिल्या लेखी फेरीत उत्तीर्ण झालेल्या इयत्ता पाचवी ते नववीतील प्रथम, प्रावीण्य व विशेष प्रावीण्य श्रेणीतील विद्यार्थ्यांनाच या डिजिटल परीक्षेला बसण्याची संधी मिळणार आहे. परीक्षा पूर्णपणे वस्तुनिष्ठ स्वरूपाची असून संगणकावर ऑनलाइन पद्धतीने घेतली जाणार आहे.

राज्यभरातील विद्यार्थ्यांचे केंद्रनिहाय मॅपिंग पूर्ण झाले असून, संबंधित एमएस-सीआयटी केंद्रांमार्फत विद्यार्थ्यांना वेळापत्रक व इतर सूचना दिल्या जात आहेत. गोवा व बेळगाव येथील विद्यार्थ्यांसाठी स्वतंत्र व्यवस्था करण्यात येणार आहे. पहिल्या लेखी आणि दुसऱ्या डिजिटल फेरीतील गुणांची सरासरी काढून प्रत्येक इयत्तेतील दहा विद्यार्थ्यांची राज्यस्तरीय गुणवत्ता यादी जाहीर करण्यात येईल. सर्व विद्यार्थ्यांना सहभागाचे ई-प्रमाणपत्र दिले जाईल, तर गुणवंत विद्यार्थ्यांना ट्रॉफी व विशेष प्रशस्तीपत्र प्रदान करण्यात येणार आहे.