पीएमपी सलाईनवर

दिवसेंदिवस पुणे महानगर परिवहन महामंडळा (पीएमपी)च्या कारभारात सुधारणा होण्याऐवजी तोटा वाढत चालला आहे. गेल्या आर्थिक वर्षातील तोट्यात तब्बल दुपटीने वाढ झाली

पुणे : दिवसेंदिवस पुणे महानगर परिवहन महामंडळा (पीएमपी)च्या कारभारात सुधारणा होण्याऐवजी तोटा वाढत चालला आहे. गेल्या आर्थिक वर्षातील तोट्यात तब्बल दुपटीने वाढ झाली असून, तोटा १३१ कोटींपर्यंत वाढला आहे. कर्मचाऱ्यांच्या पगारासाठी सलाईनवर असलेल्या पीएमपीला महापालिकेकडून पहिल्या टप्पात १३ कोटी ६४ लाख रुपयांची उचल देण्याचा प्रस्ताव स्थायी समितीपुढे आला आहे. पुणे व पिंपरी-चिंचवड परिवहन मंडळाचे २००७ला एकत्रीकरण करून पीएमपीची स्थापना करण्यात आली. स्वतंत्र कंपनी म्हणून नोंदणी करण्यात आली. त्यावेळी झालेल्या करारानुसार, पहिली तीन वर्षे दोन्ही पालिकांनी पीएमपीस अर्थसहाय्य देण्याचे ठरले होते. मात्र, तीन वर्षांनंतरही पीएमपी सक्षम होऊ शकला नाही. त्यामुळे राज्य शासनाने पुन्हा दोेन्ही पालिकांना मदत करण्याविषयी आदेश दिले आहेत. त्यानुसार अर्थसंकल्पाच्या २.५ टक्के निधी पीएमपीसाठी राखीव ठेवला जातो. दरम्यान, महापालिकेच्या अर्थसंकल्पात पीएमपीसाठीच्या तरतुदीचा शेवटचा हप्ता १२ कोटी अधिक विद्यार्थी पासचे १ कोटी ६४ लाख असे १३ कोटी ६४ लाखाची उचल देण्याविषयी स्थायी समितीच्या बैठकीत निर्णय होणार आहे. (प्रतिनिधी)