संघर्ष, जिद्द आणि यशाची कहाणी..! ताथवडेतील पान दुकानदाराची लेक झाली ‘सीए’

- तिचे वडील प्रभाकर ताथवडे परिसरामध्ये पान स्टॉल चालवितात, तर आई स्मिता गृहिणी आहे.

पिंपरी : प्रतिकूल परिस्थितीवर मात करीत जिद्द-चिकाटीच्या जोरावर ताथवडे येथील पान व्यावसायिकाच्या मुलीने सनदी लेखापाल (चार्टर्ड अकाऊंटंट) सीए परीक्षेत बाजी मारली आहे. प्रणाली प्रभाकर पाटील असे तिचे नाव आहे.

प्रणाली पाटील सध्या ताथवडे येथे वास्तव्यास आहे. तिचे वडील प्रभाकर ताथवडे परिसरामध्ये पान स्टॉल चालवितात, तर आई स्मिता गृहिणी आहे. प्रणालीचे शिक्षण थेरगाव येथील प्रेरणा विद्यालयात झाले. दहावीनंतर तिने पिंपरीतील जयहिंद महाविद्यालयातून अकरावी-बारावीपर्यंत शिक्षण घेतले. त्यानंतर बी.कॉम. पदवीचे शिक्षण पूर्ण केले. तिने २०२० पासून सीए होण्याचे ध्येय ठेवले आणि सहा वर्षांच्या अथक परिश्रमानंतर सीए झाली आहे.

प्रणालीचे वडील प्रभाकर पाटील म्हणाले की, मुलीने अत्यंत जिद्दीने, कष्टाने, परिश्रमाने, चिकाटीने अभ्यास केला आणि त्याचे फळ मिळाले. ती सीए झाली, याचा अभिमान आणि आनंद आहे. सीए परीक्षेत यश मिळविल्याबद्दल थेरगाव येथील प्रेरणा शिक्षण संस्थेच्या विद्यालयामध्ये प्रणालीचा सन्मान करण्यात आला. यावेळी संस्थापक कांतीलाल गुजर, प्राचार्य नाना शिवले, आदी उपस्थित होते.

अत्यंत नियोजनबद्ध अभ्यास

प्रणाली पाटील म्हणाली की, आमचे कुटुंब मूळचे जळगावच्या चोपडा तालुक्यातील विचखेडे येथील आहे. मात्र, गेल्या अनेक वर्षांपासून ताथवडे परिसरामध्ये वास्तव्यास आहोत. आमची परिस्थिती प्रतिकूल असून, मला मोठा भाऊ आहे. वडील पान स्टॉल चालवितात. आम्ही शिकून मोठे व्हावे हे आई-वडिलांचे स्वप्न आहे. लहानपणापासून सीए व्हायचे ठरविले होते. २०२० मध्ये प्रवेश घेतला आणि अभ्यास सुरू केला. अत्यंत नियोजनबद्ध अभ्यास केला आणि यश मिळाले. मला वाटते की जिद्दीने, चिकाटीने आणि परिश्रमपूर्वक अभ्यास केल्यास कोणत्याही क्षेत्रात यश मिळविता येते.