मुळशी तालुक्यामध्ये पेट्रोल टंचाईचे संकट; अनेक पंप बंद, अवघ्या १०० रुपयाच्या पेट्रोलसाठी लांबच लांब रांगा

पेट्रोल टंचाई असल्या कारणाने व सर्वांना व्यवस्थित पेट्रोल पुरावे, या उद्देशाने पेट्रोल पंपाच्या मालकाने प्रत्येकी अवघे शंभर रुपयांचे पेट्रोल देणे चालू केले आहे

पिरंगुट : मुळशी तालुक्यामध्ये सध्या परिस्थितीमध्ये पेट्रोल टंचाईचे संकट ओढावलेले आहे. अनेक पेट्रोलपंप हे बंद असल्याचे चित्र पाहायला मिळाले. घोटावडे फाटा येथे असलेल्या एचपी पेट्रोल पंपावर पेट्रोल वाटप सुरू होते तेव्हा त्या ठिकाणी पेट्रोल भरण्यासाठी नागरिकांनी मात्र लांबच लांब रांगा केल्याचे चित्र पाहावयास मिळाले, परंतु पेट्रोल टंचाई असल्या कारणाने व सर्वांना व्यवस्थित पेट्रोल पुरावे, या उद्देशाने पेट्रोल पंपाच्या मालकाने प्रत्येकी अवघे शंभर रुपयांचे पेट्रोल देणे चालू केले होते. परंतु शंभर रुपयाचे पेट्रोल भरण्यासाठी सुद्धा नागरिकांनी लांबच लांब रांगा केल्याचे चित्र यावेळेस पाहावयास मिळाले.

आपल्याला वेळेवर पेट्रोल, डिझेल मिळणार नाही, असे अनेक संदेश सोशल मीडियाच्या माध्यमातून पसरवले जात असल्यामुळेच नागरिकांनी सोयीचा व सुरक्षिततेचा मार्ग म्हणून घराबाहेर पडून आपली गाडीची टाकी फुल्ल करण्याचे धोरण अवलंबल्याच्या कारणाने अनेक पेट्रोलपंपावर लांबच लांब रांगा लागत असल्यानेच पेट्रोल लवकर संपत असल्याचे चित्र पाहावयास मिळत आहे. - दिलीप पासलकर, नागरिक

आम्ही पेट्रोल कंपनीशी चर्चा केली असता पेट्रोल साठ्यामध्ये कुठलीही अडचण नसल्याचे कंपनीच्या वतीने सांगण्यात येत आहे. परंतु फक्त कंपनीच्या वतीने केलेला पेट्रोल पुरवठा हा मागेपुढे होऊ शकतो. त्याच कारणाने अनेक पेट्रोलपंपावर ताळमेळ जुळत नसल्यानेच ही कोठे तरी अडचण येत असावी. अन्यथा पेट्रोल पुरवठ्यामध्ये कुठलीही समस्या नाही.- संतोष लोढा, मालक, लोढा पेट्रोल पंप