लोकमत न्यूज नेटवर्क
पुणे : ‘सगळ्यात मोठी कीड आपल्या देशाला, आपल्याच नाही तर सगळ्या जगाला लागली आहे ती म्हणजे राजकारण... ही कीड कोविडपेक्षा भयाण, घातक आणि वर्षानुवर्षे आपल्याला पोखरत जाणारी आहे. या किडीपासून बचाव करता आला तर बघा, ’’ अशी पोस्ट अभिनेत्री तेजस्विनी पंडित हिने केली असून, ती पोस्ट भलतीच व्हायरल झाली आहे. परिस्थिती किती बिकट आहे हे सांगताना ‘ अवघड आहे सगळंच....काळजी घ्या’ असा टोला देखील तिने लगावला आहे. मात्र, ही बोचरी टीका राष्ट्रवादीच्या चित्रपट,कला आणि सांस्कृतिक विभागाच्या चांगलीच जिव्हारी लागली असून, ‘सर्वच राजकारण्यांना एका चष्म्यातून पाहू नये ’ असं प्रत्युत्तर विभागाच्या प्रदेशाध्यक्षांनी या अभिनेत्रीला दिलं आहे.
मराठमोळी अभिनेत्री तेजस्विनी पंडित हिने सोशल मीडियावर केलेली पोस्ट सध्या नेटिझन्ससाठी चर्चेचा विषय ठरली आहे. अनेकांनी तिला पाठिंबा दिला असून, काही जणांनी तिला ट्रोल देखील केले आहे. परंतु, तिची पोस्ट ही कोणा एका पक्षाला उद्देशून नसतानाही, राष्ट्रवादीच्या चित्रपट,कला आणि सांस्कृतिक विभागाला ही पोस्ट काहीशी झोंबली आहे. तेजस्विनीच्या फेसबुक पोस्टनंतर राष्ट्रवादी कॉंग्रेसच्या चित्रपट सांस्कृतिक विभागाचे प्रदेशाध्यक्ष बाबासाहेब पाटील यांनी’ सर्वच राजकारण्यांना एका पारड्यात ठेवून चांगले काम करणा-या राजकारण्यांना विनाकारण आरोपीच्या पिंज-यात उभं करण ही बाबच मुळात चुकीची असल्याचं म्हटलं आहे. महाविकास आघाडी सरकारचे सर्व नेते मुख्यमंत्री, उपमुख्यमंत्री आणि आरोग्य मंत्री हे रात्रंदिवस एक करून या महामारीत लोकांना वाचवण्यासाठी एकत्र येऊन काम करताना आपण पाहात आहोत.
राजकारणावर टीका करण्यापेक्षा एक कलावंत म्हणून आपण लोकांसाठी काय करू शकतो, याचा विचार करून काहीच नाही तर एक व्हिडिओ करून तरी लोकांनी घरात राहा, सुरक्षित राहा असे आवाहन करू शकतो. राजकीय व्यवस्थेवर बोलण्यापेक्षा लोकांना आपण किती मदत करतो, यावर भर दिला तर त्याचे सर्वत्र कौतुक होईल, असा टोला देखील त्यांनी तेजस्विनीला लगावला आहे..
-----------------------------------