‘भीमाशंकर’ची सत्ता राष्ट्रवादीने राखली

भीमाशंकर सहकारी साखर कारखाना निवडणुकीत राष्ट्रवादी काँग्रेस पुरस्कृत भीमाशंकर सहकार पॅनलने सर्वच्या सर्व २१ जागा जिंकल्या आहेत.

मंचर : भीमाशंकर सहकारी साखर कारखाना निवडणुकीत राष्ट्रवादी काँग्रेस पुरस्कृत भीमाशंकर सहकार पॅनलने सर्वच्या सर्व २१ जागा जिंकल्या आहेत. शिवसेना पुरस्कृत श्री भीमाशंकर शेतकरी सहकार पॅनलला दारुण पराभवाला सामोरे जावे लागले. खासदार शिवाजीराव आढळराव-पाटील यांच्या पत्नी कल्पना आढळराव-पाटील, कारखान्याचे विद्यमान संचालक शिवाजीराव ढोबळे, जिल्हा परिषदेचे माजी उपाध्यक्ष अरुण गिरे यांना पराभव स्वीकारावा लागला. कारखान्याचे संचालक माजी विधानसभा अध्यक्ष दिलीप वळसे-पाटील यांचे भीमाशंकर कारखान्यातील एकहाती निर्विवाद वर्चस्व सिद्ध झाले आहे.पाच जागा बिनविरोध निवडून आल्या होत्या. उर्वरित १६ जागांसाठी निवडणूक झाली. राष्ट्रवादी पुरस्कृत भीमाशंकर सहकार पॅनलने १६ जागांवर, तर शिवसेना पुरस्कृत श्री भीमाशंकर शेतकरी सहकार पॅनलने १२ जागांवर उमेदवार उभे केले. या जागांसाठी ६६ टक्के मतदान झाले होते. सकाळी ८ वाजता मंचर येथील क्रीडा संकुलाच्या सभागृहात मतमोजणीला सुरुवात झाली.सर्वप्रथम भटक्या विमुक्त जाती व जमाती किंवा विशेष मागास प्रवर्गातील निकाल जाहीर झाला. राष्ट्रवादी काँग्रेस पुरस्कृत भीमाशंकर सहकार पॅनलचे रमेश हरिभाऊ लबडे विजयी झाले. त्यांना ५,७७६ मते मिळाली. शिवसेना पुरस्कृत भीमाशंकर शेतकरी सहकार पॅनलचे गणेश पंडित यांना १५९० मते मिळाली. त्यानंतर इतर मागासवर्गीय प्रतिनिधी गटाचा निकाल जाहीर झाला. राष्ट्रवादी काँग्रेस पुरस्कृत पॅनलचे रमेश यशवंत कानडे ५७८४ मते मिळून विजयी झाले. रांजणी-शिंगवे या गटाकडे सर्वांचे लक्ष होते. येथून राष्ट्रवादी काँग्रेसचे वसंतराव चिमणराव खालकर हे अपक्ष उभे होते. मात्र, त्यांचा कुठलाही परिणाम राष्ट्रवादीच्या उमेदवारावर झाला नाही. खालकर यांना ११५० मते मिळाली. या गटातून राष्ट्रवादी काँग्रेस पुरस्कृत बाबासाहेब धोेंडिबा खालकर ५४१० मते, कारखान्याचे विद्यमान अध्यक्ष देवदत्त जयवंतराव निकम ५६५८ मते, दादाभाऊ बजाबा पोखरकर ५५६५ मते हे विजयी झाले. या गटातील शिवसेना पुरस्कृत पॅनलचे एकमेव उमेदवार साहेब दगडुजी थोरात यांना १५५४ मते मिळूून ते पराभूत झाले. एकूण १९ हजार ७७४ मतदान झाले. त्यापैकी ४३७ मते बाद झाली.दरम्यान, शेवटच्या निकाल सव्वासहा वाजता जाहीर झाला. त्यानंतर राष्ट्रवादीच्या कार्यकर्त्यांनी मतदान केंद्राबाहेर येऊन जल्लोष केला. निवडणूक निर्णय अधिकारी म्हणून प्रांत कल्याण पांढरे यांनी, तर सहायक म्हणून तहसीलदार बी. जे. गोरे यांनी काम पाहिले. कल्पनाताई आढळराव-पाटील यांना धक्कामहिला राखीव गटात खासदार शिवाजीराव आढळराव-पाटील यांच्या पत्नी कल्पनाताई यांना पराभव स्वीकारावा लागला. त्यांना केवळ १९५७ मते मिळाली आहेत. शिवसेना पुरस्कृत पॅनलच्या मीना गावडे (१४१९ मते) याही पराभूत झाल्या. राष्ट्रवादी पुरस्कृत पॅनलच्या कल्पना गाढवे ५४३० मते व मंदाकिनी संपतराव हांडे ५३५० मते मिळवून विजयी झाल्या. दोन्ही उमेदवारांचे मताधिक्य चार हजारांहून अधिक मतांचे अंतर होते. कल्पनाताई पाटील यांच्या पराभवामुळे सर्व निकाल एकतर्फी लागणार हे निश्चित झाले़ (वार्ताहर)------केलेल्या कामाची पावतीसाखर कारखान्याच्या माध्यमातून गेली १५ वर्षे शेतकऱ्यांसाठी केलेले कामाची पावती मतदारांनी देऊन आम्हाला मोठ्या मताच्या अंतराने विजयी केले. विरोधकांनी निवडणूक लादल्याचे मतदारांनी आजच्या मतदानावरून सिद्ध केले आहे़ यापुढेही असेच जोमाने काम करून दाखवू़ - दिलीप वळसे पाटील,संस्थापक व आमदार ---------कुकरची शिट्टी वाजलीच नाहीराष्ट्रवादीच्या उमेदवारांना कपबशी, तर शिवसेनेच्या उमेदवारांना कुकर चिन्ह मिळाले होते. एकमेव अपक्ष उमेदवार वसंतराव खालकर यांना बादली चिन्ह मिळाले. मतदानाच्या दिवशी कपबशी चालणार की कुकरची शिट्टी वाजणार, ही चर्चा पारावर सुरू होती. निकाल एकतर्फी लागला तेव्हा ‘कुकरची शिट्टी वाजलीच नाही...’ अशी चर्चा कार्यकर्त्यांमध्ये सुरू झाली.