साकुर्डेवर राष्ट्रवादीचे वर्चस्व

साकुर्डे ग्रामपंचायतीवर राष्ट्रवादी काँग्रेसचे वर्चस्व राहिले असले, तरीही सत्तास्थापनेसाठी त्यांना एका उमेदवाराची गरज भासेल. यात त्यांच्यावर काँग्रेस किंवा शिवसेना यांपैकी एकाशी

जेजुरी : साकुर्डे ग्रामपंचायतीवर राष्ट्रवादी काँग्रेसचे वर्चस्व राहिले असले, तरीही सत्तास्थापनेसाठी त्यांना एका उमेदवाराची गरज भासेल. यात त्यांच्यावर काँग्रेस किंवा शिवसेना यांपैकी एकाशी जुळवून घेण्याची वेळ आलेली आहे. साकुर्डे ग्रामपंचायतीची निवडणूक अत्यंत चुरशीची झाली. सुरुवातीला राष्ट्रवादी काँग्रेस, काँग्रेस आणि शिवसेना अशी तिरंगी लढत असणाऱ्या निवडणुकीत राष्ट्रवादी काँग्रेसच्या सरपंचपदाच्या उमेदवार माईसाहेब सस्ते यांच्या विरोधात सेना काँग्रेसच्या उमेदवारांनी एकमेकांना पाठिंबा देण्याचा निर्णय घेतल्याने वॉर्ड क्र. १मध्ये मोठी चुरस निर्माण झाली होती. शेवटच्या टप्प्यात येथील लढतीचे चित्र दुरंगी झाले होते. तरीही राष्ट्रवादीच्या उमेदवारांनी ही लढत मोठ्या फरकाने जिंकली आहे. येथून माईसाहेब ऊर्फ पौर्णिमा हरिश्चंद्र सस्ते, सचिन अरुण थोपटे, तृप्ती नीलेश जगताप यांनी पराभूत उमेदवारापेक्षा दुपटीहून अधिक मतांनी विजय मिळविला आहे. वॉर्ड २ हा सुरुवातीला जनता दलाचा व नंतर काँग्रेसचा गेल्या ४० वर्षांपासून बालेकिल्ला म्हणून ओळखला जातो. येथे सेना काँग्रेसची युती झाली नव्हती. राष्ट्रवादी काँग्रेसकडून येथे इतर मागासवर्गीय जागेसाठी केवळ एक उमेदवार दिला होता. दोन महिला प्रवर्ग जागेवर उमेदवार उभे केले नव्हते. शिवसेनेच्या शैला जाधव आणि स्वाती सस्ते या उमेदवारांनी मोठी मुसंडी मारून काँग्रेसच्या दोन उमेदवारांना पराभूत केले. तिसरा एकमेव काँग्रेसचा उमेदवार राहुल हरिभाऊ भोंगळे विजयी झाला आहे. वॉर्ड ३ हा राष्ट्रवादीचा बालेकिल्ला ओळखला जातो. येथे मात्र काँग्रेसचे विद्यमान सरपंच राजेंद्र ज्ञानोबा सस्ते आणि सुनील सुभाष चव्हाण यांनी विजय संपादन केला असून, राष्ट्रवादीच्या सविता जगताप निसटत्या मताधिक्याने विजयी झाल्या. येथे सेनेचे दोन्ही उमेदवार पराभूत झाले. मतमोजणीनंतर ग्रामपंचायतीत राष्ट्रवादी काँग्रेसचे चार, काँग्रेसचे तीन आणि शिवसेनेचे दोन उमेदवार, असे बलाबल निर्माण झाले आहे. (वार्ताहर)