पत्नीचा खून करून ‘गॅलरीतून पडली’चा बनाव; बिबवेवाडीतील हत्याकांड उघड

पोलिसांनी दिलेल्या माहितीनुसार, आरोपी शुभम घोडके हा पत्नी सारिका हिच्या चारित्र्यावर संशय घेत वारंवार तिच्याशी वाद घालत होता. या वादातूनच त्याने संतापाच्या भरात सारिका हिला बेदम मारहाण केली.

किरण शिंदे 

चारित्र्याच्या संशयातून पत्नीची निर्घृण हत्या करून ती गॅलरीतून पडल्याने मृत्यू झाल्याचा बनाव रचणाऱ्या पतीला बिबवेवाडी पोलिसांनी अटक केली आहे. या धक्कादायक घटनेमुळे परिसरात एकच खळबळ उडाली आहे. या घटनेत सारिका शुभम घोडके (वय २३) या विवाहितेचा मृत्यू झाला असून, पोलिसांनी तिचा पती शुभम श्रीकांत घोडके (वय २९) याला अटक केली आहे. ही घटना २४ मार्च रोजी सायंकाळच्या सुमारास घडली. याप्रकरणी बिबवेवाडी पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, आरोपी शुभम घोडके हा पत्नी सारिका हिच्या चारित्र्यावर संशय घेत वारंवार तिच्याशी वाद घालत होता. या वादातूनच त्याने संतापाच्या भरात सारिका हिला बेदम मारहाण केली. त्यानंतर धारदार शस्त्राने तिच्यावर वार करत गंभीर जखमी केले. गंभीर जखमी अवस्थेत सारिका हिला तत्काळ रुग्णालयात दाखल करण्यात आले. मात्र डॉक्टरांनी तपासणीनंतर तिला मृत घोषित केले.

दरम्यान, घटनेची माहिती मिळताच बिबवेवाडी पोलिसांनी घटनास्थळी धाव घेतली. प्राथमिक पाहणीतच पोलिसांना संशय आला. आरोपीने ‘गॅलरीतून पडल्याने मृत्यू झाला’ असा दावा केला असला, तरी घटनास्थळावरील परिस्थिती आणि जखमांचे स्वरूप यामुळे पोलिसांचा संशय अधिकच बळावला.

यानंतर पोलिसांनी शुभम घोडके याला ताब्यात घेऊन कसून चौकशी केली. चौकशीदरम्यान त्याने गुन्ह्याची कबुली दिली. त्यानुसार पोलिसांनी त्याला अटक करून न्यायालयासमोर हजर केले असून पुढील तपास सुरू आहे.