महापालिका निवडणूक! काँग्रेसचे निरीक्षक सतेज पाटील सोमवारी पुण्यात; खांदेपालटाच्या चर्चेसही पुन्हा सुरूवात

बदल व्हावा अशा इच्छेने कार्यरत झालेले पदाधिकारी, कार्यकर्तेही त्यामुळे थंड झाले, मात्र आता पुणे शहरात निरीक्षक येत असल्याने पुन्हा एकदा या चर्चेने जोर धरला आहे

पुणे: काँग्रेसच्या प्रदेश समितीने पुणे शहरासाठी नियुक्त केलेले निरीक्षक सतेज पाटील सोमवारी (दि.९) पुण्यात येत आहेत. पदाधिकारी व कार्यकर्त्यांची ते भेट घेणार आहेत. महापालिका निवडणुकासंबधीचे प्राथमिक नियोजन करण्यासाठी ते येत असल्याचे समजते, मात्र त्यातून शहर पदाधिकाऱ्यांच्या खांदेपालटाच्या चर्चेस पुन्हा सुरूवात झाली आहे.

प्रदेशाध्यक्षपदी नियुक्ती झाल्यानंतर लगेचच हर्षवर्धन सपकाळ यांनी राज्यातील सर्व जिल्हा व शहरांसाठी निरीक्षक नियुक्त केले. त्यांना स्थानिक पदाधिकारी, कार्यकर्ते यांची भेट घेऊन बदलासंबधी चर्चा करावी व तसा अहवाल द्यावा असे आदेश दिले. त्याप्रमाणे पुण्यासह राज्यात सर्वत्र निरीक्षकांचे दौरे, भेटीगाठी सुरू होत्या. काही जणांनी अध्यक्षपदासाठी तीन नावांसहचे अहवालही प्रदेश शाखेला सादर केले. मात्र दरम्यानच्या काळात सर्वोच्च न्यायालयाचा स्थानिक स्वराज्य संस्थांच्या निवडणुकासंबधीचा आदेश आला. गेली काही वर्षे रखडलेल्या निवडणुका येत्या चार महिन्यात घ्यावा असा हा आदेश होता. त्यामुळे काँग्रेसची जिल्हाध्यक्ष, शहराध्यक्ष बदलाची सर्व प्रक्रियाच थंडावली.

बदल व्हावा अशा इच्छेने कार्यरत झालेले पदाधिकारी, कार्यकर्तेही त्यामुळे थंड झाले. मात्र आता पुणे शहरात निरीक्षक येत असल्याने पुन्हा एकदा या चर्चेने जोर धरला आहे. सतेज पाटील यांच्या दौऱ्याची माहिती शहर शाखेकडूनच देण्यात आली आहे. त्यात पाटील दुपारी ४ ते सायंकाळी ६ पर्यंत काँग्रेसभवनमध्ये भेटीसाठी उपलब्ध असतील असे म्हटले आहे. त्यामुळे शहराध्यक्षपदासाठी इच्छुक असलेल्यांकडून पुन्हा एकदा मोर्चेबांधणी सुरू झाली आहे. गटबाजीने शहर काँग्रेसला ग्रासले असून त्यातून पक्षाला बाहेर काढायचे असेल तर ताज्या दमाचा नवा तरूण शहराध्यक्ष महापालिका निवडणुकीआधी नियुक्त करणे गरजेचे असल्याचे मत पाटील यांच्याकडे व्यक्त करण्यात येणार असल्याचे समजते.

निवडणुकीच्या तोंडावर सहसा कोणत्याही राजकीय पक्षाकडून संघटनेत सहसा बदल केला जात नाही. विद्यमान शहराध्यक्ष अऱविंद शिंदे यांच्या समर्थकांना तसेच होईल असे वाटते आहे. खुद्द शिंदे यांनीही आपली ३ वर्षांची कारकिर्द प्रभारी म्हणूनच होती, त्यामुळे आता आपल्याला नियमीत नियुक्ती द्यावी असे मत पक्षश्रेष्ठींकडे व्यक्त केले असल्याची माहिती मिळाली. त्यामुळे ते व त्यांचे समर्थक शांत आहेत.

शहरातील काँग्रेसच्या वर्चस्वाला मागील सलग तीन पंचवार्षिकमध्ये ओहोटीच लागली आहे. लोकसभा, विधानसभा निवडणुकीत शहरात सातत्याने अपयश येते आहे. महापालिका निवडणुकीतही चांगली कामगिरी करणे पक्षाला अशक्य झाले आहे. विसर्जीत महापालिकेत पक्षाचे फक्त ९ नगरसेवक होते. अनेकांनी पक्षाला सोडचिठ्ठी दिली आहे तर काहींनी काम थांबवले आहे. पक्षाला संजीवनी मिळवून देण्याचे आव्हान त्यामुळे पक्षश्रेष्ठींपुढे आहे.