सावित्रीबाई फुले पुणे विद्यापीठात चिखल आंदोलन; विद्यार्थ्यांची वसतीगृहासाठी संतप्त मागणी

विद्यार्थ्यांनी चिखलात बसत, हातात फलक घेत प्रशासनाच्या निष्क्रियतेविरोधात आवाज उठवला. विद्यापीठ प्रशासनाच्या दुर्लक्षामुळे विद्यार्थ्यांना होस्टेलसाठी दररोज भटकंती करावी लागत आहे, असा आरोपही यावेळी करण्यात आला आहे.

पुणे : सावित्रीबाई फुले पुणेविद्यापीठात प्रवेश घेतलेल्या सर्व विद्यार्थ्यांना सरसकट वसतीगृह मिळावे, या प्रमुख मागणीसाठी आज विद्यापीठात 'चिखल आंदोलन'  केले जात आहे. NSUI, ASP, DAPSA, SSD आणि MRP या विद्यार्थी संघटनांनी एकत्र येत भर पावसात आंदोलन करत प्रशासनाचा निषेध नोंदवला.

सावित्रीबाई फुले पुणे विद्यापीठात प्रवेश घेतलेल्या सर्व विद्यार्थ्यांना सरसकट वसतीगृह मिळावे, या प्रमुख मागणीसाठी विद्यापीठात विद्यार्थ्यांचे 'चिखल आंदोलन' #Punepic.twitter.com/djjGdlzXMi

— Lokmat (@lokmat) July 15, 2025

विद्यार्थ्यांनी चिखलात बसत, हातात फलक घेत प्रशासनाच्या निष्क्रियतेविरोधात आवाज उठवला. विद्यापीठ प्रशासनाच्या दुर्लक्षामुळे विद्यार्थ्यांना होस्टेलसाठी दररोज भटकंती करावी लागत आहे, असा आरोपही यावेळी करण्यात आला आहे. आंदोलनकर्त्यांनी सांगितले की, विद्यापीठातील वसतिगृहांची दुरवस्था, प्रवेश घेतलेल्या विद्यार्थ्यांची होस्टेलमध्ये गोंधळलेली स्थिती आणि पावसाळ्यात निर्माण होणाऱ्या अडचणी लक्षात घेता, वसतीगृह व्यवस्थापनात तातडीने सुधारणा करणे अत्यावश्यक आहे. भर पावसातही विद्यार्थ्यांचा लढा सुरुच आहे, आणि प्रशासनाने जर लवकरात लवकर सकारात्मक निर्णय घेतला नाही, तर आंदोलन अधिक तीव्र करण्यात येईल, असा इशाराही देण्यात आला आहे.

या आहेत विद्यार्थ्यांच्या प्रमुख मागण्या  

- तात्काळ गेस्ट व होस्टल शुल्क सुरू करावे

- मुलांचे होस्टेल क्र. १० तात्काळ सुरू करावे

- सर्व प्रवेशित विद्यार्थिनींना तात्काळ वसतीगृह उपलब्ध करावे