वडिलांची म्हातारपणात स्वतःसाठीच विवाह नावनोंदणी; मुलाने चिडून वडीलांचा केला दगडाने ठेचून खून

म्हतारपणात वडिलांनी स्व:ताच्या लग्नासाठी वधु - वर सुचक मंडळात विवाह नांव नोंदणी केल्यामुळे चिडून जाऊन मुलाकडून वयोवृध्द वडीलांचा दगडाने ठेचुन खुन झाल्याची घटना राजगुरूनगर शहरात घडली आहे

राजगुरुनगर : म्हतारपणात वडिलांनी स्व:ताच्या लग्नासाठी वधु - वर सुचक मंडळात विवाह नांव नोंदणी केल्यामुळे चिडून जाऊन मुलाकडून वयोवृध्द वडीलांचा दगडाने ठेचुन खुन झाल्याची घटना राजगुरूनगर शहरात घडली आहे. शंकर रामभाउ बो-हाडे ( वय ८० ) रा, वैशांयपन आळी, राजगुरूनगर ता. खेड, असे खुन झालेल्याचे नांव आहे. याबाबत आरोपी शेखर शंकर बो-हाडे (वय ४७ ) याला पोलिसांनीअटक केली आहे. खून केल्याची कबुली व फिर्याद स्वःता आरोपीने पोलिस ठाण्यात येऊन दिली.

या घटनेबाबत खेड पोलिसांनी दिलेल्या माहितीनुसार, शंकर रामभाउ बो-हाडे यांनी परस्पर वधु - वर सुचक मंडळात पैसे भरून स्वत:च्या लग्नाची नोंदणी केली होती. याबाबत आरोपी मुलगा शेखर बो-हाडे यांच्याशी वडील शंकर बोऱ्हाडे खोटे बोलले. या गोष्टीचा राग अनावर झाल्याने शेखर बोऱ्हाडे यांने किचन रूममधील कांदा कापण्याची सुरी घेवुन वडीलांचा गळा कापण्याचा प्रयत्न केला. परंतु सुरीला धार नसल्याने गळा कापला गेला नाही. घरात असलेल्या दगडी वरवंटयाने वडील शंकर बोऱ्हाडे यांच्या तोंडावर व डोक्यात जोराचे प्रहार करून खून केला. या घटनेचा पुढील तपास खेड पोलिस ठाण्याचे पोलिस निरिक्षक सतिश गुरव करित आहे.