माळेगाव : सहकारमहर्षी चंद्रराव तावरे यांनी आयुष्यातील ४५ वर्षे सहकारात खर्ची केली. त्यातून सभासदांच्या आयुष्यात आर्थिक स्थैर्य येऊन सभासदांची उन्नती झाली. चंद्रराव तावरे यांच्या वयावर अजित पवार बोलतात, त्यांचे वय झाले, त्यांची स्मरणशक्ती कमी झाली, त्यांना विस्मरण होत आहे, चंद्रराव तावरे हे तुमचे काका शरद पवार यांच्याच वयाचे आहेत, याचे तरी भान अजित पवार यांनी ठेवावे. वडीलधाऱ्यांवर टीका करण्याची आपली संस्कृती नसल्याचा विसर अजित पवार यांना पडल्याची टीका माळेगाव कारखान्याचे माजी अध्यक्ष रंजन तावरे यांनी केली आहे.
माळेगाव खुर्द येथे सहकार बचाव शेतकरी पॅनलच्या सभेत तावरे बोलत होते. यावेळी तावरे पुढे म्हणाले, अजित पवार सहकाराचे पुरस्कर्ते नसून ते सहकाराचे मारेकरी आहेत. त्यांनी कर्जत तालुक्यातील जगदंबा कारखाना तसेच कोरेगाव तालुक्यातील शालिनीताई पाटील यांचा जरांडेश्वर कारखाना सभासदांच्या ताब्यातून हिसकावून घेतला. स्वतःची खासगी मालकी प्रस्थापित केली आहे, तर ते कसे सहकाराचे पुरस्कर्ते झाले. त्यामुळे त्यांच्यावर माळेगाव कारखान्याचा सभासद कदापि विश्वास ठेवणार नाही, असेही ते म्हणाले.
माळेगाव कारखान्याच्या सभासदांचा विकास हा केवळ चंद्रराव तावरे यांच्यामुळे झाला. ५८ वर्षे लोकसभेला व विधानसभेला तालुक्याने नेहमीच पवारांना साथ दिली. सर्व काही तुम्हालाच दिलं तरी तुम्ही समाधानी नाही. माळेगावची निवडणूक पवारांनी प्रतिष्ठेची केली आहे, त्यांना काही करून माळेगाव कारखाना ताब्यात घ्यायचा आहे. माळेगावच्या सभासदांनी आपल्या मुला-बाळांच्या भविष्याचा विचार करून मतदान करावे, असे आवाहन तावरे यांनी केले.
अजित पवार सत्तेचा गैरवापर करून दमदाटी व दडपशाही करतात. त्यांच्या झुंडशाहीला सभासद मतदानातून नक्कीच उत्तर देतील आणि सहकार बचाव शेतकरी पॅनलच्या उमेदवारांना प्रचंड मतांनी विजयी करतील, अशी आम्हाला खात्री आहे. - ॲड. श्यामराव कोकरे