ग्रामोन्नती मंडळ कृषि विज्ञान केंद्र नारायणगाव आणि कांदा व लसूण संशोधन संचालनालय राजगुरुनगर, यांच्या संयुक्त विद्यमाने कांदा पिकातील कीड व रोग व्यवस्थापन याविषयीचे एकदिवसीय शेतकरी प्रशिक्षण कृषि विज्ञान केंद्र नारायणगाव येथे आयोजित करण्यात आले होते. या कार्यक्रमासाठी कांदा व लसूण संशोधन संचालनालयाचे रोगशास्त्र विभागाचे प्रधान शास्त्रज्ञ डॉ. सुरेश गावंडे, केव्हीकेचे पीक संरक्षण शास्त्रज्ञ डॉ. दत्तात्रय गावडे, अश्विनी केसकर, विनोद जाधव, आयटीसीचे प्रशांत साळवे व उत्तम जाधव उपस्थित होते.
डॉ. दत्तात्रय गावडे म्हणाले की, या वर्षी कांदा पिकावर हवामान बदलामुळे कीड व रोगाचा प्रादुर्भाव जास्त प्रमाणात दिसून येत आहे. त्यामध्ये कांदा रोपवाटिकामधून प्रामुख्याने मर रोगाचा प्रादुर्भाव दिसून येत आहे. त्यासाठी ट्रायकोडर्मा व सुडोमोनस या जैविक बुरशीचा वापर करून रोपवाटिका तसेच कांदा पिकातील मर रोगाचे व्यवस्थापन करता येईल.
स्वागत व प्रास्ताविक केव्हीकेचे पीक संरक्षण शास्त्रज्ञ डॉ. दत्तात्रय गावडे यांनी केले. आयटीसीचे प्रशांत साळवे यांनी सूत्रसंचालन केले व आभार मानले.