LPG Gas Crisis: गॅस सिलिंडरनंतर आता खाद्यतेलाच्या दरात वाढ; महागाईने कोलमडले गृहिणींचे बजेट

- जागतिक बाजारपेठेतील घडामोडी आणि आयातीवरील शुल्कात दरवाढ झाल्याचा थेट परिणाम भारतीय बाजारपेठेवर झाला आहे.

पुणे : अमेरिका, इस्रायल आणि इराण यांच्यात सुरू असलेल्या युद्धाचा मोठा फटका भारतीयांना बसला आहे. युद्धाच्या पार्श्वभूमीवर देशात व्यावसायिक सिलिंडर गॅस कंपन्यांनी वितरण व बुकिंगसाठी बंदी घातली आहे. तर घरगुती गॅस टंचाई भासत असल्याने नागरिकांच्या गॅस सिलिंडरसाठी रांगा लागत आहेत. त्याचा फटका सहन करावा लागत आहे.

त्यातच घरगुती गॅस सिलिंडरच्या किमतीत झालेल्या दरवाढीमुळे सामान्य जनता होरपळत आहे. त्यातच आता खाद्यतेलाच्या किमती प्रतिलिटर १० ते १५ रुपयांनी वाढल्या आहेत. पुण्याच्या मार्केटयार्डासह किरकोळ बाजारात खाद्यतेलाच्या किमतीत मोठी वाढ झाल्याने १५ लिटर तेलाच्या डब्याच्या किमतीत १०० ते १५० रुपयांनी वाढ झाल्याने गृहिणींचे स्वंयपाकघरातील बजेट पूर्णपणे कोलमडले आहे.

खाद्यतेलाच्या दराचा उडाला भडका

जागतिक बाजारपेठेतील घडामोडी आणि आयातीवरील शुल्कात दरवाढ झाल्याचा थेट परिणाम भारतीय बाजारपेठेवर झाला आहे. प्रामुख्याने सोयाबीन, सूर्यफूल आणि पामतेलाच्या दरात गेल्या पंधरा दिवसांत लिटरमागे १५ ते २५ रुपयांची वाढ झाली आहे. तर १५ लिटरच्या डब्यामागे १५० ते २०० रुपयांनी महाग झाला आहे. मागील आठवड्यात तेलाचा १५ लिटरचा डबा हा २२०० ते २३०० रुपयांना मिळत होता. आता १५ लिटरच्या तेलाच्या डब्यासाठी २४०० ते २५०० रुपये मोजावे लागत आहेत.

असे आहेत खाद्यतेलाचे दर

तेलाचा प्रकार - जुना दर (प्रतिलिटर) - नवा दर (प्रतिलिटर)

सोयाबीन तेल  - १४० ते १४५-   १५५ ते १६०

सूर्यफूल तेल  - १४५ ते १५५ -   १६६ ते १७०

पामतेल -११५ ते १२५ - १४५ ते १५०

शेंगदाणा तेल - १८० ते १९०  -  २०० ते २२०

- हॉटेल व्यावसायिकांचेही दणाणले धाबे

केवळ घरगुती वापरासाठीच नव्हे, तर पुण्यातील हॉटेल व्यावसायिकांनाही या दरवाढीचा मोठा फटका बसला आहे. वडापाव, भजी आणि इतर तळलेल्या पदार्थांच्या किमतीही यामुळे वाढण्याची शक्यता निर्माण झाली आहे. चहाचा दर १० रुपयांवरून १२ रुपये, तर वडपाव २० ते २५ रुपयांवर गेला आहे. हॉटेलमधील खाद्यवस्तू कमी करण्यात आल्या आहेत. अशा परिस्थितीत व्यवसाय कसा करायचा? असा प्रश्न व्यावसायिकांना पडला आहे, तर दुसरीकडे या महागाईच्या काळात घरखर्च कसा भागवायचा? असा प्रश्न ग्राहकांना पडला आहे.

गुडीपाढवा हा सण दोन दिवसांवर येऊन ठेपला असतानाच सणासुदीच्या दिवसांत खाद्यतेलाच्या किमती वाढणे ही चिंतेची बाब आहे. गॅस आणि तेल या दोन्ही जीवनावश्यक वस्तू महागल्याने महिन्याचे नियोजन करणे कठीण झाले आहे. - आरती अष्टूळ, गृहिणी, संतनगर  

 

पुण्याच्या मार्केटयार्डात सध्या मालाची आवक स्थिर असली तरी साठवणूक आणि वाहतूक खर्च वाढल्याने किरकोळ बाजारात ग्राहकांना किलोमागे १० ते १५ रुपये जादा पैसे मोजावे लागत आहेत. जोपर्यंत आंतरराष्ट्रीय स्तरावर पुरवठा सुरळीत होत नाही, तोपर्यंत दर चढतेच राहण्याची शक्यता बाजारात वर्तविली जात आहे. - रायकुमार नहार, तेलाचे व्यापारी

गॅस आणि तेल या दोन्ही जीवनावश्यक वस्तू आहेत. त्यात मागील काही दिवसांपासून पुण्यात गॅस सिलिंडर टंचाई भासत आहे. त्यातच गॅस सिलिंडर ६० रुपयांनी महाग झाला आहे. तर आज किराणा दुकानात तेलाची खरेदी करण्यासाठी गेली असताना तेलाच्या दरातही प्रतिलिटर मागे १५ रुपयांची वाढ झाली आहे. किरकोळ बाजारात सूर्यफूल तेल १८० रुपयांना एक लिटर मिळत आहे. यामुळे अशा परस्थितीत आम्ही जगायचे तरी कसे? असा मोठा प्रश्न आहे.  - स्वाती शिर्के, गृहिणी 

युद्धाच्या पार्श्वभूमीवर कच्चा माल आणि समुद्रामार्गे होणारी वाहतूक यामुळे दरात वाढ झाली आहे. पूर्वी जुन्या डब्यातून तेल येत होते. आता नवा डबा आल्याने त्यात ५० ते ६० रुपयांनी दर वाढलेले आहेत. तर १५ किलोंच्या तेलाच्या डब्यात १०० ते १२५ रुपयांची वाढ डब्यामागे झाली आहे. नागरिकांनी पॅनिक होण्याची गरज नाही. तेलाचा मुबलक साठा उपलब्ध आहे.  - सतवीर गोयल, तेल व्यापारी, मार्केटयार्ड