Ready Reckoner: यंदा रेडिरेकनरचे दर जैसे थे; पुण्यात कोरेगाव पार्क परिसर सर्वांत महागडा

आगामी निवडणुका विचारात घेऊन राज्य सरकारने रेडीरेकनरच्या दरात कोणताही बदल केलेला नाही

पुणे: कोरोना संकटातून सावरून आर्थिक व्यवस्था रूळावर आल्याने यंदा रेडिरेकनरचे दर वाढतील अशी शक्यता वर्तविण्यात येत होती. मात्र, पुढील वर्षी होऊ घातलेल्या लोकसभा आणि त्यानंतरच्या विधानसभा निवडणुका लक्षात घेऊन वार्षिक बाजार मूल्यदरात कोणताही बदल न करण्याचा निर्णय राज्य सरकारने घेतला आहे. त्यामुळे २०२० च्या दरांनुसार पुण्यात कोरेगाव पार्क परिसर हा सर्वांत महागडा असणार आहे. त्या खालोखाल प्रभात रस्त्याचे दुसरे स्थान कायम राहिले आहे.

 कोरोनामुळे १ एप्रिल २०२० ऐवजी सप्टेंबर २०२० मध्ये रेडीरेकनर दरात वाढ करण्यात आली होती. त्यानंतर गेल्या वर्षी म्हणजे २०२१-२२ या आर्थिक वर्षात रेडीरेकनरचे दर ‘जैसे थे’ ठेवण्यात आले होते. तर त्यानंतर पुन्हा कोरोनामुळे राज्याची आर्थिक स्थिती चांगली नसल्याने गेल्या वर्षी (२०२२-२३) राज्यात रेडीरेकनर दरात घसघशीत वाढ करत राज्य सरकारने नागरिकांना धक्का दिला होता. आगामी निवडणुका विचारात घेऊन राज्य सरकारने रेडीरेकनरच्या दरात कोणताही बदल केलेला नाही

रेडीरेकनरमध्ये कोणताही बदल न केल्यामुळे गेल्यावर्षीचेच दर आगामी वर्षभरासाठी लागू होणार असल्याने उच्चभू लोकवस्ती असलेला कोरेगाव पार्क परिसर हा सर्वांत महागडा असणार आहे. त्या खालोखाल प्रभात रस्त्याचे दुसरे स्थान कायम आहे. त्यानंतर भांडारकर रोड, लॉ कॉलेज रोड, बोट क्लब, जंगली महाराज रस्ता, कर्वेरोड फर्ग्युसन रोड हेदेखील महागड्या परिरसराच्या रांगेत आहेत.