पुणे : कारागृह व सुधार सेवा विभागाचे विशेष पोलीस महानिरीक्षक जालिंदर सुपेकर यांना वैष्णवी हगवणे आत्महत्या प्रकरण चांगलेच भोवले आहे. या प्रकरणात गुन्हा दाखल करण्याबाबत तसेच वैष्णवीचा पती शशांक याला शस्त्र पुरविण्यात सहभाग असल्याचे स्पष्ट झाल्यानंतर सुपेकर यांची अखेर मुंबईत होमगार्डच्या उपमहासमादेशकपदी तडकाफडकी बदली करण्यात आली आहे. बदली करताना सुपेकर यांचे हे पद अवनत करण्यात आले आहे. त्यामुळे सुपेकर यांच्यावर मोठी नामुष्की ओढविली आहे.
अशातच जालिंदर मामांचा अंजली दमानिया यांनी आणखी एक कारनामा समोर आणला आहे. वैष्णवीच्या वडिलांकडून १ लाख रुपये पूनम जालिंदर सुपेकर यांच्या नावाने घेतले. तुम्ही रुखवत नका करू, मामी (पूनम जालिंदर सुपेकर) सुंदर रूखवत करतील असे सांगून १ लाखाचा चेक आणि ५०,००० रोख हे हगवणे कुटुंबाने वैष्णवीच्या माहेरच्यांकडून वसूल केले असल्याचे दमानिया यांनी ट्विटरच्या माध्यमातून सांगितले आहे. दूरच्या नातलगांना कोणी पैसे द्यायला सांगतात का? असा सवालही दमानिया यांनी उपस्थित केला आहे.
आमच्याकडून दीड लाख घेतले
दरम्यान मुलीच्या रुखवतासाठी वैष्णवीच्या सासू आणि नणंदने सुपेकरांच्या पत्नीला ऑर्डर देण्यास सांगितल्याचे कस्पटे म्हणाले आहेत. आम्ही मुलीच्या रुखवतासाठी ऑर्डर द्यायला गेलो तर वैष्णवीची सासू लता हगवणे, नणंद करिष्मा हगवणे ह्या दोघी म्हणाल्या की, रुखवताची ऑर्डर तुम्ही देऊ नका. आमचे पाहुणे जालिंदर सुपेकर यांच्या पत्नी एकदम छान रुखवत बनवतात. तेव्हा तिच्या सासूने आमच्याकडून १ लाख रुपयांचा चेक घेतला. तसेच ५० हजार रोखही आमच्याकडून घेतले.
सुपेकरांनी परवाना मिळवून दिला
शशांक हगवणे आणि सुशिल हगवणे यांनी खोटे पुरावे देऊन २०२२ मध्ये शस्त्र परवाना मिळविला आहे. हगवणे बंधूंना पुणे ग्रामीण पोलिसांनी शस्त्र परवाना देण्यासाठी नकार दिला होता. कारण त्यावेळी ठोस असं काही कारण नव्हतं. त्यानंतर त्यांनी पुणे पोलीस शहर दलामध्ये शस्त्र मिळण्यासाठी अर्ज दाखल केला. त्यावेळी पोलीस आयुक्त अमिताभ गुप्ता आणि अपर पोलीस आयुक्त (प्रशासन) जालिंदर सुपेकर हे होते. या अर्जाची खातरजमा करण्याची जबाबदारी प्रशासन म्हणून त्यांचे मामे सासरे जालिंदर सुपेकर यांच्यावर होती. मात्र, त्यांनी दिलेल्या खोट्या पुराव्यांची पडताळणी झाली नाही. ही पडताळणी होऊ न देण्यामागे सुपेकर यांचा हात असल्याचे बोलले जात आहे. त्यावरती जालिंदर सुपेकर यांची सही देखील आहे. या दोघांनाही शस्त्र परवाना मंजूर करताना जालिंदर सुपेकर यांनी सही दिली असल्याची माहिती समोर आली आहे. नवीन शस्त्र परवाना मिळण्याकरीता केलेल्या अर्जामध्ये खोटी माहिती सादर करुन फसवणुक केल्याचे निष्पन्न झाले आहे