नारायण बडगुजर
पिंपरी - वैष्णवी हगवणे आत्महत्या प्रकरणात अडकलेला हगवणे कुटुंबावर आर्थिक फसवणुकीचा गुन्हा दाखल करण्यात आला. याप्रकरणी त्यांचे जेसीबी मशीन जप्त करण्यात आले. महाळुंगे एमआयडीसी पोलिसांनी ही कारवाई केली. तसेच याप्रकरणात प्रोडक्शन वाॅरंट काढण्यात आले आहे.
प्रशांत अविनाश येळवंडे (३३, रा. निघोजे, ता. खेड, जि. पुणे) यांनी याप्रकरणी २९ मे रोजी महाळुंगे एमआयडीसी पोलिस ठाण्यात फिर्याद दिली. त्यानुसार शशांक राजेंद्र हगवणे आणि लता राजेंद्र हगवणे (दोघेही रा. भुकूम, ता. मुळशी, जि. पुणे) यांच्या विरोधात पोलिसांनी गुन्हा दाखल केला.
वैष्णवी हगवणे हिने सासरच्या छळाला कंटाळून १६ मे रोजी मुळशी तालुक्यातील भूकुम येथे आत्महत्या केली. याप्रकरणी तिचा पती शशांक, सासरा राजेंद्र, सासू लता, दीर सुशील आणि नणंद करिष्मा यांच्यावर हुंडाबळी व मृत्यूस कारणीभूत ठरल्याप्रकरणी बावधन पोलिस ठाण्यात १७ मे रोजी गुन्हा दाखल करण्यात आला. त्यानंतर पती, सासू-सासरा, नणंद, दीर यांना पोलिसांनी अटक केली. यातील पती शशांक, सासू लता आणि नणंद करिष्मा यांची न्यायालयीन कोठडीत रवानगी करण्यात आली आहे. तसेच सासरा राजेंद्र आणि दीर सुशील हे पोलिस कोठडीत आहेत.
दरम्यान, लता हगवणे हिच्या नावावर असलेल्या जेसीबी मशीनचा व्यवहार करण्यात आला. प्रशांत येळवंडे यांनी हे जेसीबी मशीन खरेदी करण्याचा व्यवहार ठरला. जेसीबी मशीनसाठी घेतलेल्या बँक कर्जाच्या हप्त्याची दरमहा ५० हजारांची रक्कम प्रशांत येळवंडे हे शशांक हगवणेला देत होते. मात्र, शशांकने हप्ते न भरता रिकव्हरी एजंटला हाताशी धरून जेसीबी मशीन फिर्यादी येळवंडे यांच्याकडून काढून स्वत:च्या ताब्यात घेतले. फिर्यादी येळवंडे यांचा विश्वासघात करून त्यांच्या रकमेचा अपहार करून फसवणूक केली. येळवंडे हे संबंधित रक्कम किंवा मशीनची मागणी करण्यासाठी वारंवार गेले. त्यावेळी शशांक याने त्याच्या कमरेवरील पिस्तुलावर हात ठेवून पिस्तुलाचा धाक दाखवून जिवे ठार मारण्याची धमकी दिली. यात फिर्यादी येळवंडे यांना ११ लाख ७० हजार रुपयांचा आर्थिक फटका बसल्याचे फिर्यादीत नमूद आहे.
पोलिसांचा न्यायालयाकडे अर्ज
शशांक आणि लता हगवणे यांच्या अटकेसाठी महाळुंगे पोलिसांनी प्रोडक्शन वाॅरंट जारी केले आहे. आर्थिक फसवणूक प्रकरणी महाळुंगे एमआयडीसी पोलिस ठाण्यात दाखल गुन्ह्याच्या तपासकामी शशांक आणि लता यांना ताब्यात देण्यात यावे, असा अर्ज महाळुंगे एमआयडीसी पोलिसांनी न्यायालयाकडे सादर केला आहे.
प्रोडक्शन वाॅरंट म्हणजे काय?
प्रोडक्शन वॉरंट म्हणजे, न्यायालयीन कोठडीत असलेल्या एखाद्या व्यक्तीला तपासकामी ताब्यात देण्यात येण्याबाबतचा जारी केलेला आदेश. हा आदेश विशेषतः तपासाच्या उद्देशाने किंवा खटल्यात हजर राहण्यासाठी दिला जातो.
पोलिस ठाण्यात समोरासमोर चौकशी
दरम्यान, पोलिस कोठडीत असलेल्या नीलेश चव्हाण, राजेंद्र हगवणे आणि सुशील हगवणे यांना रविवारी बावधन पोलिस ठाण्यात चौकशीसाठी नेण्यात आले. तिघांची समोरासमोर चौकशी करण्यात आली.