​पंतप्रधानांनी कौतुक केलेला ‘कलाकार कट्टा’ स्थलांतरित? भाजपच्या नगरसेवकांचे महापालिका आयुक्तांना पत्र

फूटपाथवर उभारलेला ‘कलाकार कट्टा’, या जागेमुळे वर्दळीच्या चौकात वाहतुकीस अडथळा निर्माण होतो, त्यामुळे हा कट्टा पर्यायी ठिकाणी हलविण्यात यावा, अशी मागणी नगरसेवकांनी केली आहे

पुणे: भाजपच्या माजी नगरसेविका ज्योत्स्ना एकबोटे यांच्या संकल्पनेतून गुडलक चौकातील ‘कलाकार कट्टा’ साकारण्यात आला आहे. विशेष म्हणजे, पंतप्रधान नरेंद्र मोदी यांनी ‘मन की बात’मध्ये या कलाकार कट्ट्याचे कौतुक केले आहे. मात्र, या परिसरात वाहतुकीची कोंडी होत असल्याच्या कारणावरून हा कट्टा इतरत्र हलविण्याच्या हालचाली सुरू झाल्या आहेत. भाजपच्याच नगरसेवकांनी महापालिका आयुक्तांना कलाकार कट्टा स्थलांतरित करण्यासंबंधी लेखी पत्र दिल्याने आश्चर्य व्यक्त होत आहे.

भांडारकर रस्त्याला लागूनच फुटपाथच्या एका बाजूला कलाकार कट्ट्यावर शांतपणे कॅनव्हासवर चित्र रेखाटणारे कलाकार, वाद्यांचे सादरीकरण करणारे तरुण वादक आणि शॉपिंगला आलेल्या पुणेकरांची कट्ट्यावर थांबणारी पावले, असे नित्यनेमाने पाहायला मिळत असलेले चित्र. गुडलक कॅफेच्या प्रवेशद्वाराजवळील फूटपाथवर उभारलेला ‘कलाकार कट्टा’, कलाकारांचे प्रदर्शन आणि बसण्याच्या जागेमुळे वर्दळीच्या चौकात वाहतुकीस अडथळा निर्माण होतो. वाहतूक सुरळीत करण्यासाठी हा कट्टा पर्यायी ठिकाणी हलविण्यात यावा, अशी मागणी नगरसेवकांनी केली आहे. दरम्यान, भाजपच्या नगरसेवकांनी पत्र दिल्यानंतर महापालिका आयुक्त नवलकिशोर राम यांनी घटनास्थळाची पाहणी केली.

हा कलाकार कट्टा भाजपच्या पाठिंब्यानेच झाला आहे. तेव्हा कळले नाही का? आत्ता कुठे कलाकार कट्टा नावारूपाला आला आहे. तुम्ही एखादे झाड तोडून दुसरीकडे लावणार का? आम्ही केवळ इथे कलाच सादर करीत नाही तर पुणेकरांना शिस्तही लावण्याचा प्रयत्न करतो. गर्दीच्या ठिकाणी कला पाहिली जाणार ना? - आनंद टेके, चित्रकार

मी कलाकार कट्ट्यावर साडेतीन वर्षांपासून कला सादर करीत आहे. कलाकारांना या कट्ट्यावर जास्त चांगला प्रतिसाद मिळतो. लोकांनी यावे आणि आमच्या कलेचे कौतुक करावे, असे वाटते. आमच्याकडे अनेक तरुण कलाकारांना स्फूर्ती मिळाली आहे. - राकेश लोखंडे, चित्रकार

कलाकार कट्टा सुरू होण्याच्या आधीपासून मी इथे कला सादर करीत आहे. आमच्या इथे बसण्यामुळे जर वाहतूक कोंडी होणार असेल तर मग इतर रस्त्यावरच्या वाहतूक कोंडीचे काय? प्रत्येक माणूस इथे पोटासाठी येत आहे. - चंद्रकांत विभांडीक, ज्येष्ठ चित्रकार

फर्ग्युसन रस्त्यावरील गुडलक चौकातील कलाकार कट्ट्यासंदर्भात नागरिकांच्या आणि नगरसेवकांच्या काही तक्रारी आल्या आहेत. या अनुषंगाने मी स्वत: तेथे जाऊन पाहणी केली. या कट्ट्याचा वाहतुकीला अडथळा होत असल्याचे प्रथमदर्शनी दिसते. मात्र, याबाबत कोणताही निर्णय घाई गडबडीने घेतला जाणार नाही. विरोध करणारे आणि कट्ट्याच्या बाजूने असणाऱ्यांच्या बाजू ऐकून घेतल्यानंतरच योग्य तो निर्णय घेतला जाईल. - नवल किशोर राम, आयुक्त, महापालिका, पुणे.

‘कलाकार कट्टा’ स्थलांतरित करण्याबाबतच्या भाजपच्या नगरसेवकांनी दिलेल्या निवेदनाचा आम्ही निषेध करतो. वाहतुकीस कोणताही थेट अडथळा निर्माण होणार नाही, याची पूर्ण काळजी घेऊनच तो उभारण्यात आला आहे. उलट, हा कट्टा पुणे शहरासह संपूर्ण महाराष्ट्रातील चित्रकार, व्यंगचित्रकार, शिल्पकार आणि विविध कला सादर करणाऱ्या तरुण पिढीतील कलाकारांसाठी एक खुले व्यासपीठ आहे. - बाबासाहेब पाटील, प्रदेशाध्यक्ष राष्ट्रवादी चित्रपट व सांस्कृतिक विभाग