पुणे : दर्शना पवार हत्याप्रकरण ताजे असताना पुण्याच्या सदाशिव पेठेत थरारक घटना घडली आहे. महाविद्यालयीन तरुणीवर पुण्यातील सदाशिव पेठ एकतर्फी प्रेमातून प्राणघातक हल्ला करण्यात आला. मुलीसोबत असणारा मित्रही त्यावेळी खूप घाबरला होता. या हल्ला करणाऱ्या तरुणाला पाहून तोही लांब सरसावला. त्यावेळी मुलगी जीव मुठीत धरून त्या घटनास्थळावरून पाळताना दिसून आले आहे. या घटनेनतंर मुलाला अटकही करण्यात आली आहे. अशातच जखमी मुलीने त्यावर प्रतिक्रिया दिली आहे.
तो माझा मित्र होता. त्याला मी नाही म्हटलं म्हणून त्याने मला जीवे मारण्याची धमकी दिली. माझा काही दोष नसताना कॉलेजजवळ येऊन मला मारहाण करायचा. नेहमी माझा पाठलाग करत असे. त्याच्या घरच्यांना सांगितलं पण त्याच्या घरच्यांनी दुर्लक्ष केलं. घरच्यांना सांगितलं म्हणून त्याने आज माझ्यावर वार केला. हाताला लागलं आहे. डोक्याला टाके पडले आहेत. अशी प्रतिक्रिया तरुणीने दिली.
सदाशिव पेठेतील पेरू गेट पोलीस चौकी पासून अवघ्या काही अंतरावर हा प्रकार घडला. प्रेमाला नकार दिल्याने चिडलेल्या तरुणाने या तरुणीचा पाठलाग करत तिच्यावर कोयत्याने वार केले. अचानक झालेल्या या हल्ल्याने ही तरुणी गंभीर जखमी झाली असून तिच्यावर पुना हॉस्पिटलमध्ये उपचार सुरू आहेत. घटनास्थळी पोलीस दाखल झाले होते. या घटनेनंतर तरुणाला जमावाने चांगलाच चोप दिला. आणि त्यानंतर पोलिसांच्या ताब्यात दिले.
या धक्कादायक घटनेत तरुणी आणि तिचा मित्र गाडीवरून जाताना दिसत आहेत. त्यावेळी अचानक आरोपी तरुण त्यांच्या शेजारी येऊन अडवण्याचा प्रयत्न करत आहे. त्यांच्यामध्ये बाचाबाची झाल्याचेही व्हिडिओच्या माध्यमातून समोर आले आहे. गाडीवरचा तरुण लगेच उतरून आरोपी तरुणाला ढकलताना दिसून आले आहे. तेवढ्यात आरोपीने कोयता काढून वार करण्यास सुरुवात केली आहे. त्यावेळी मुलीबरोबर असणारा तरुण आरोपीपासून लांब गेला आहे. आणि आरोपी कोयता घेऊन तरुणीच्या मागे धावत जाताना दिसत आहे. पुढे जाऊन आरोपीने तरुणीवर प्राणघातक हल्लाही केला आहे. या हल्ल्यात ती गंभीर जखमी झाली आहे. हे घडत असताना आजूबाजूच्या नागरिकांनी तरुणाला पकडण्याचा प्रयत्न केला. परंतु तरुण जोरजोरात कोयता फिरवू लागला आहे. त्यानंतर जमावाने तरुणाला पकडून चांगलाच चोप दिल्याचे दिसून आले आहे.