एकमेकांचा सन्मान करा !

राष्ट्रवादीने आपल्याला महापालिकेतील पदे विकासकामे करण्यासाठी दिली आहेत, आपआपसात भांडत बसण्यासाठी नाही. एकमेकांचा सन्मान करायचा असतो,

पुणे : राष्ट्रवादीने आपल्याला महापालिकेतील पदे विकासकामे करण्यासाठी दिली आहेत, आपआपसात भांडत बसण्यासाठी नाही. एकमेकांचा सन्मान करायचा असतो, हे तुम्हाला कोणत्या भाषेत सांगितले पाहिजे, असे खडे बोल माजी उपमुख्यमंत्री अजित पवार यांनी पदाधिकाऱ्यांना सुनावले. गेल्या काही दिवसांपासून महापालिकेतील राष्ट्रवादीच्या पदाधिकाऱ्यांमध्ये कुरबुरीचे राजकारण सुरू आहे. महापालिकेच्या सर्वसाधारण सभेतील खराडी व वडगावशेरी पाणी प्रश्नावरून स्थायी समिती अध्यक्ष अश्विनी कदम व सर्वपक्षीय गटनेत्यांमध्ये वाद झाला होता. त्यानंतर गटनेत्यांनी बहिष्कार घालण्याचा निर्णय घेतला होता. महापौर दत्तात्रय धनकवडे यांच्या कारभाराविषयी माजी सभागृहनेते सुभाष जगताप यांनी सर्वसाधारण सभेत जाहीर टीका केली होती. त्यावर गेली चार वर्षे जगताप यांनी डोळ्याला पट्टी लावली होती का? असे प्रत्युत्तर महापौर धनकवडे यांनी दिले होते. राष्ट्रवादीतील पदाधिकाऱ्यांचा वाद चव्हाट्यावर आल्याने अजित पवार व्यथीत झाले होते. त्यामुळे बारामती हॉस्टेल येथे महापौर दत्तात्रय धनकवडे, शहराध्यक्ष अ‍ॅड. वंदना चव्हाण, स्थायी समिती अध्यक्ष अश्विनी कदम व सभागृहनेते बंडू केमसे यांच्याशी पवार यांनी रविवारी चर्चा केली. त्या वेळी महापालिकेतील कारभारावरून सर्व पदाधिकाऱ्यांना त्यांनी खडे बोल सुनावले. महापालिकेतील माजी पदाधिकाऱ्यांचे मार्गदर्शन घेण्याच्या सूचनाही त्यांनी केल्या. (प्रतिनिधी)