रोजंदारी करणाऱ्या बापाची उच्चशिक्षित पोरगी निघाली अमेरीकेला

जिद्द असेल, तर सामान्य कुटुंबातील मुलेही किती पुढे जाऊ शकतात, याचे हे प्रेरणादायी उदाहरण आहे

बारामती - बारामतीत सुरू असलेल्या आंतरराष्ट्रीय कार्यशाळेच्या निमित्ताने ज्येष्ठ नेते शरद पवार दोन दिवसांच्या बारामती दौऱ्यावर आहेत. शुक्रवारी (दि. २०) पत्रकारांनी पवार यांना ‘एआय’ तंत्रज्ञानाची वैशिष्ट्ये आणि शेतकऱ्यांना होणाऱ्या संभाव्य फायद्यांबाबत विचारणा केली. यावेळी पवार यांनी ‘एआय’मध्ये उच्च शिक्षणासाठी थेट अमेरिकेला निघालेल्या माळेगावच्या मुलीची ओळख पत्रकारांशी करून देत तिच्या कर्तृत्वाचे कौतुक केले.

यावेळी पवार म्हणाले, “एआयमुळे शेतीसमोरील विविध आव्हानांवर मात करणे शक्य होईल. येथील मुला-मुलींना याचे ज्ञान मिळावे, यासाठी एआय शिक्षणाची संधी उपलब्ध करून दिली आहे. माळेगावच्या या मुलीने ही संधी साधत थेट अमेरिकेच्या दिशेने झेप घेतली आहे. तिचे वडील रोजंदारीवर काम करतात, तरीही जिद्द आणि अभ्यासाच्या बळावर तिने अमेरिकेतील विद्यापीठात एआयच्या मास्टर्ससाठी प्रवेश मिळवला आहे. जिद्द असेल, तर सामान्य कुटुंबातील मुलेही किती पुढे जाऊ शकतात, याचे हे प्रेरणादायी उदाहरण आहे. या मुलीचे शिक्षण शारदानगर व विद्या प्रतिष्ठानमध्ये झाले आहे, आणि या दोन्ही संस्था आपण उभ्या केल्याचेही पवारांनी यावेळी नमूद केले.

दरम्यान, या मुलीचे नाव आल्फीया जावेद तांबोळी आहे. तिने माध्यमांशी बोलताना सांगितले की, “शारदानगर येथे १ ली ते १२ वी पर्यंत माझे शिक्षण झाले. ‘साहेब’ माझ्या आजोबांचे वर्गमित्र असल्याने आमच्या कुटुंबाची त्यांच्याशी चांगली ओळख आहे. शिक्षणात मी सातत्याने ‘टॉप’मध्ये असल्यामुळे ‘साहेबां’मुळे मला ८ वी ते १२ वी दरम्यान शिष्यवृत्ती मिळाली.

१२ वीला ‘टॉप थ्री’मध्ये आले म्हणून एआय इंजिनिअरिंगला विद्या प्रतिष्ठानमध्ये प्रवेश घेण्याच्या वेळी अजितदादांनी मदत केली. माझे वडील रोजंदारीवर कामाला जातात, तर आई शिवणकाम आणि पार्लर चालवते. मला एक भाऊ व एक बहीण आहे. अमेरिकेत उच्च शिक्षणासाठी जाण्याच्या प्रक्रियेत ‘साहेबां’नी दिलेली मदत माझ्यासाठी अत्यंत मोलाची ठरली. अमेरिकेत भारतीय प्राध्यापकांच्या मार्गदर्शनाखाली एआयवर संशोधन करण्याची माझी इच्छा आहे,” असे तिने सांगितले.