पुणे: पुण्यात विजांचा कडकडाट आणि मेघगर्जनेसह मुसळधार पावसाला सुरुवात झाली आहे. दहा ते बारा दिवसांच्या विश्रांतीनंतर शहराला मुसळधार पावसाने चांगलेच झोडपले. दिवसभर ढगाळ वातावरण असून वातावरणात गरमीही मोठ्या प्रमाणावर जाणवत होती. अखेर सायंकाळनंतर मुसळधार पावसाला सुरुवात झाली. दरम्यान, पुढील तीन दिवसांसाठी पुणे जिल्ह्याला ‘ऑरेंज अलर्ट’ देण्यात आला आहे.
यंदाचा मे महिना उन्हाळ्यापेक्षाही पावसाळी हंगामाचा अधिक ठरला. त्यातच मोसमी वाऱ्यांचे दहा ते पंधरा दिवस लवकर आगमन झाले. त्यामुळे मे महिन्यात सरासरीपेक्षा अधिक पावसाची नोंद झाली. साधारपणे २७ मे नंतर पुण्यात पावसाने विश्रांती घेतली. तब्बल दहा ते बारा दिवसांच्या विश्रांतीनंतर पुन्हा पावसाचे पुण्यात धुवाधार आगमन झाले आहे. सिंहगड रस्ता, सातारा रस्ता, कात्रज, बिबवेवाडी, स्वारगेट, भंडारकर रस्ता, प्रभात रस्त्यासह मध्यवर्ती पेठेमध्ये मुसळधार पाऊस झाला. रस्त्यांना नाल्याचे स्वरूप आले होते. अनेक रस्ते जलमय झाले होते. वाहनचालकांना जीव मुठीत धरून वाहन चालविणे भाग पडत होते. काही ठिकाणी विजेचा लपंडाव सुरू होता. आज (शुक्रवारी) मुसळधार पावसाचा अंदाज आयएमडीने दिला आहे.
रस्ते झाले जलमय
अचानक मुसळधार पाऊस सुरु झाल्याने नागरिकांची चांगलीच तारांबळ उडाल्याचे दिसून आले आहे. रस्त्यावरून मोठ्या प्रमाणात पाणी वाहू लागले आहे. नेहमीप्रमाणे पुन्हा एकदा पुण्यातील रस्त्यांना नद्यांचे स्वरूप आले होते. सर्वच रस्ते जलमय झाल्याचे दिसून आले.
शहरात झाडपडीच्या ३४ घटना
पुणे सातारा रस्ता, लक्ष्मी रस्ता, बिबवेवाडी, सिंहगड रस्ता, न-हे,कोरेगाव पार्क, बाणेर, कोथरूड, वारजे, हडपसर, मार्केटयार्ड, गोखलेनगर, नवले ब्रिज, महर्षीनगर, नारायण पेठ, धनकवडी, वानवडी, वडगाव शेरी, कल्याणीनगर, धायरी, पाषाण आदीसह विविध ठिकाणी झाडपडीच्या ३४ घटना घडल्या.