केडगाव : दौंड तालुक्यातील वाखारी येथे गावात फिरून कोळसा गोळा करणाऱ्या मजुराने आपल्या पत्नीचा खून करून तो शेजारच्या जागेत दगडांमध्ये पुरला असल्याची धक्कादायक घटना रविवारी उघडकीस आली. यामुळे परिसरात खळबळ उडाली आहे. यवत पोलिसांनी आरोपी पतीला अटक केली असल्याची पोलीस निरीक्षक नारायण पवार यांनी दिली.
रमेश सुंदर वाघमारे (वय ३०, रा. कोरली, ता. मुरूड, जि. रायगड, सध्या रा. वाखारी, ता. दौंड) असे आरोपीचे नाव आहे, तर माया रमेश वाघमारे असे खून करण्यात आलेल्या पत्नीचे नाव आहे.
पोलिसांनी दिलेल्या माहितीनुसार, रमेश सुंदर वाघमारे कुटुंबासह वाखारी येथे राहतो. पत्नी माया हिच्याबरोबर पैशाच्या देवाण-घेवाणीवरून रमेशचा वाद झाला. या वादातून रमेशने मायाला मारहाण केली. या मारहाणीत तिचा मृत्यू झाला. कुणाला कळू नये म्हणून रमेशने तिचा मृतदेह शेजारच्या जागेत असलेल्या विहिरीच्या दगडाच्या ढिगाऱ्यात पुरला.
येथील कोळसा व्यापारी नितीन सुरेश ठोंबरे हे रमेश वाघमारे याच्याकडे आले असताना तुझी बायको कुठे आहे? असे विचारले. त्यावेळी दारूच्या नशेत असलेल्या रमेश वाघमारे याने तिला त्याने मारून टाकल्याचे सांगितले. त्यानंतर नितीन ठोंबरे यांनी यवत पोलीस ठाण्यात याबाबत फिर्याद दिली. यवत पोलीस निरीक्षक नारायण पवार यांनी घटनास्थळी भेट देऊन, आरोपी रमेश वाघमारे याला ताब्यात घेतले आहे.
चार चिमुकले अनाथ
''आई माया यांच्या मृत्यूमुळे तसेच वडील रमेश यांना अटक केल्यामुळे त्यांना असणारी चार अपत्य अनाथ झाली आहेत. यवत पोलिसांनी त्यांच्या जेवणाची सोय केली आहे. भविष्यात सामाजिक संस्थांनी पुढे येऊन त्यांच्या पालनपोषणाची जबाबदारी घ्यावी, असे आवाहन पोलीस निरीक्षक नारायण पवार यांनी केले.''