पंधरा दिवसांवर आले होते लग्न मात्र नियतीने हिरावले सारे... 

माणूस अनेकदा स्वप्न बघत असतो पण काळाच्या मनात मात्र वेगळेच काही असते. अशीच अत्यंत हृदयद्रावक घटना पुण्यात घडली आहे. अवघ्या पंधरा दिवसांवर लग्न आलेल्या युवकाचा अपघातात दुर्दैवी मृत्यू झाला आहे. 

पुणे  : माणूस अनेकदा स्वप्न बघत असतो पण काळाच्या मनात मात्र वेगळेच काही असते. अशीच अत्यंत हृदयद्रावक घटना पुण्यात घडली आहे. अवघ्या पंधरा दिवसांवर लग्न आलेल्या युवकाचा अपघातात दुर्दैवी मृत्यू झाला आहे. 

याबाबत अधिक माहिती अशी की, डंपरच्या चाकाखाली सापडल्याने विराज प्रताप निकम ( वय २९,  रा. मानव मंदिर सोसायटी धनकवडी, पुणे) याचा मृत्य झाला आहे .तर प्रितेश प्रवीण शहा ( वय २९, रा. गुलाब नगर सोसायटी धनकवडी, पुणे) हा तरुण या अपघातात  जखमी झाला आहे. ही घटना बुधवारी दुपारी एक वाजण्याच्या सुमारास नवले पुलाजवळ घडली. विराज व प्रीतेश हे दोघे नऱ्हे येथील नवले पुलाजवळील सेवा रस्त्यावरून ऍक्टिवावरून (क्रमांक MH १२ PV ९४८४) नवले पुलाच्या सिग्नलकडे जात असताना डंपरच्या( क्रमांक MH १२ HB १५५५) चाकाखाली आल्याने त्यात गंभीर जखमी झाले. नागरिकांनी तात्काळ जखमींना खासगी रुग्णालयात दाखल केले असता उपचारादरम्यान विराजचा मृत्यू झाला.

विराजचे १९ मार्च रोजी लग्न होते. तो मित्रासोबतचे काम उरकून घरातल्या व्यक्तींसोबत स्नेह्यांकडे केळवणास जाणार होता. त्यामुळे घरातही सगळे त्याची वाट बघत होते. मात्र तो प्रत्यक्ष जाण्यापूर्वीच त्याच्या मृत्यूची खबर पोचल्याने कुटुंबियांना मोठा धक्का बसला आहे. लग्नाची तयारी पूर्ण झाली असताना प्रत्यक्ष नवरदेवाचाच करुण अंत झाल्याने परिसरात हळहळ व्यक्त केली जात आहे. दरम्यान अपघात घडल्यानंतर डंपर जागेवरच सोडून चालक घटनास्थळावरून पसार झाला असून पोलिस त्याचा शोध घेत आहेत. रात्री उशिरापर्यंत सिंहगड पोलीस ठाण्यात गुन्हा दाखल करण्याचे काम सुरू होते.