पुणे : महाराष्ट्र संघटित गुन्हेगारी नियंत्रण कायद्यान्वये (मकोका) कारवाई केल्यानंतर गेले तीन वर्ष पोलिसांना गुंगारा देणाऱ्या सराईताला वारजे पोलिसांनीअटक केली. आकाश सिब्बन गौड (२३, रा. .शिवणे, मूळ रा. गोरखपुर, उत्तरप्रदेश) असे अटक करण्यात आलेल्या सराईताचे नाव आहे. त्याच्याविरोधात वारजे माळवाडी आणि मार्केट यार्ड पोलिस ठाण्यात गंभीर गुन्हे दाखल आहेत.
गौड आणि साथीदारांनी ५ ऑक्टोबर २०२२ रोजी क्रिकेट खेळताना झालेल्या वादातून शुभम मानकर याच्यावर कोयत्याने वार केले होते, तसेच त्याला दांडक्याने बेदम मारहाण करून गंभीर जखमी केले. याप्रकरणी वारजे माळवाडी पोलिस ठाण्यात खुनाचा प्रयत्न केल्याप्रकरणी गुन्हा दाखल करण्यात आला होता. गौड याच्यासह साथीदारांविरोधात वारजे पोलिसांनी मकोका कारवाई केली होती. दरोड्याच्या गुन्ह्यात मार्केट यार्ड पोलिस ठाण्यातही गौडसह साथीदारांविरोधात मकोका कारवाई करण्यात आली होती. कारवाईनंतर गौड पसार झाला होता.
पसार झालेल्या गौडचा शोध घेण्यासाठी वारजे पोलिसांचे पथक उत्तर प्रदेशातील गोरखपूर येथे गेले होते. त्याच्या नातेवाईकांसह मित्रांकडे चौकशी करण्यात आली. तेव्हा गौड तेलंगणा वास्तव्यास असल्याची माहिती मिळाली होती. तो वास्तव्याचे ठिकाण सातत्याने बदलत होता. गौड हा वारजे-एनडीए रस्त्यावर असलेल्या शिवणे भागात आल्याची माहिती पोलिस उपनिरीक्षक संजय नरळे यांना २६ जून रोजी खबऱ्याने दिली. त्यानंतर शिवणे भागातील मैदानावर सापळा लावून त्याला ताब्यात घेण्यात आले.
अपर पोलिस आयुक्त राजेश बनसोडे, उपायुक्त संभाजी कदम, एसीपी भाऊसाहेब पटारे यांच्या मार्गदर्शनाखाली वारजे पोलिस ठाण्याचे वरिष्ठ पोलिस निरीक्षक विश्वजीत काईंगडे, गुन्हे शाखेचे निरीक्षक निलेश बडाख यांच्या मार्गदर्शनाखाली उपनिरीक्षक संजय नरळे, पोलिस कर्मचारी सागर कुंभार, गणेश शिंदे, योगेश वाघ, अमित शेलार, बालाजी काटे, निखिल तांगडे, शरद पोळ, अमित जाधव, अमोल झणझणे आणि गोविंद कपाटे यांनी ही कामगिरी केली.
गुन्हे शाखेकडून फरार गुंड अटकेत..
मकोका कारवाईनंतर फरार झालेल्या कात्रज भागातील सराईताला गुन्हे शाखेच्या युनिट दोनने अटक केली. रुपेश राजन केंद्रे (१९, रा. सच्चाईमाता मंदिराजवळ, कात्रज) असे अटक करण्यात आलेल्याचे नाव आहे. आंबेगाव पोलिसांनी केंद्रे आणि साथीदारांविरोधात मकोका कारवाई केली होती. कारवाईनंतर तो फरार झाला होता. तो कात्रज भागात आल्याची माहिती उज्ज्वल मोकाशी आणि शंकर कुंभार यांना मिळाली. पोलिसांनी सापळा लावून त्याला पकडले. अपर पोलिस आयुक्त पंकज देशमुख, उपायुक्त निखिल पिंगळे, एसीपी गणेश इंगळे यांच्या मार्गदर्शनाखाली पोलिस निरीक्षक अंजुम बागवान, सहायक निरीक्षक आशिष कवठेकर, अमोल रसाळ, मोकाशी, कुंभार, शंकर नेवसे, संजय जाधव आणि निखिल जाधव यांनी ही कारवाई केली.