हाॅटेलवर एसटी प्रवाशांची होणारी गैरसोय दूर करा; अन्यथा कारवाई; परिवहन मंत्री प्रताप सरनाईकांचा इशारा

- परिवहन मंत्री प्रताप सरनाईक यांची महामार्गावरील हॉटेल थांब्यांना अचानक भेट

पुणे :महाराष्ट्र राज्य परिवहन महामंडळाकडून महामार्गावर प्रवाशांच्या सोयीसाठी काही हाॅटेलबरोबर करार केला आहे. यामुळे चहा, जेवणासाठी बस हाॅटेलवर थांबविण्यात येते. परिवहन मंत्री प्रताप सरनाईक पंढरपूर दौऱ्यावर असताना पुणे-सोलापूर महामार्गावरील एसटीच्या अधिकृत हॉटेल थांब्यांना अचानक भेट दिली. यावेळी महिला प्रवाशांनी प्रसाधनगृहाच्या अस्वच्छतेबाबत तक्रार नोंदवली. ही प्रसाधनगृहे तातडीने दुरुस्त करा; तसेच आढळलेल्या इतर त्रुटी विहीत वेळेत दूर करा, अन्यथा हा हॉटेल थांबा नाईलाजाने रद्द करण्यात येईल, असे निर्देश त्यांनी दिले.

एसटी हाॅटेल थांब्यावर अन्नपदार्थ ताजे आहेत का? अन्नपदार्थ वाजवी दरात मिळतात का? तसेच महामंडळाची नाश्ता योजना चालू आहे का? याची चौकशी केली. याबरोबरच तेथील प्रसाधनगृहाची देखील त्यांनी आवर्जून पाहणी केली. दरम्यान, भिगवणजवळील एका अनधिकृत हॉटेल थांब्यावर एसटीच्या अनेक बसेस थांबलेल्या परिवहन मंत्री प्रताप सरनाईक यांच्या निदर्शनास आले. त्यांनी तेथे भेट देऊन पाहणी केली असता, अत्यंत अस्वच्छ वातावरणात प्रवाशांना जेवण वाढले जात असल्याचे त्यांना दिसून आले. याबाबत त्यांनी तीव्र नाराजी व्यक्त करून संबंधितांवर कडक कारवाई करावी, असे एसटीच्या अधिकाऱ्यांना निर्देश दिले.

भिगवणला लवकरच नवे बसस्थानक

भिगवण बसस्थानकात असलेल्या असुविधांबाबत स्थानिक रहिवाशांनी कैफियत मांडली. महामार्गामुळे हे बसस्थानक सखल भागात गेल्याने पावसाळ्यात पाणी साचून अत्यंत गैरसोय होते. तसेच येथील सध्या वापरात असलेली प्रसाधनगृहेदेखील अत्यंत तकलादू व अस्वच्छ असतात, अशा तक्रार स्थानिक रहिवाशांनी केली. याबाबत महामंडळाच्या बांधकाम विभागाचे महाव्यवस्थापक दिनेश महाजन यांच्याशी संवाद साधून नव्या प्रशस्त भिगवण बसस्थानकाची निविदा लवकरात लवकर प्रसिद्ध करण्याच्या सूचना दिल्या.