पुणे : भरधाव बसने पादचारी ज्येष्ठ दाम्पत्याला धडक दिल्याची घटना पुणे-सोलापूर रस्त्यावरील शेवाळवाडी परिसरात घडली. अपघातात पादचारी ज्येष्ठ नागरिकाचामृत्यू झाला. याप्रकरणी हडपसर पोलिसांनी बस चालकाविरोधात गुन्हा दाखल केला.
जयंत भामरे (६३, रा. ग्रीनवुड्स, मांजरी, हडपसर) असे मृत्युमुखी पडलेल्या ज्येष्ठ नागरिकाचे नाव आहे. अपघातात भामरे यांची पत्नी वैशाली गंभीर जखमी झाल्या असून, त्यांच्यावर खासगी रुग्णालयात उपचार सुरू असल्याची माहिती पोलिसांनी दिली. याबाबत भामरे यांची मुलगी प्रियांका (२८) यांनी हडपसर पोलिस ठाण्यात फिर्याद दिली आहे. त्यांनी दिलेल्या फिर्यादीनुसार, बस चालक संजय उज्जैनराव दिंडे (४६, रा. संतकृपा सोसायटी, चिखली) याच्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, भामरे दाम्पत्य शनिवारी (दि. १८) सायंकाळी पावणेसातच्या सुमारास पुणे-सोलापूर रस्त्यावरून निघाले होते. शेवाळवाडी भाजी मंडईजवळ रस्ता ओलांडणाऱ्या भामरे दाम्पत्याला भरधाव बसने धडक दिली. अपघातात जयंत आणि त्यांची पत्नी वैशाली जखमी झाल्या. या घटनेची माहिती मिळताच पोलिसांनी घटनास्थळी धाव घेतली. दोघांना तातडीने खासगी रुग्णालयात दाखल करण्यात आले. उपचारापूर्वीच जयंत यांचा मृत्यू झाला होता. पोलिस उपनिरीक्षक अशोक गांधले पुढील तपास करत आहेत.